الەۋمەتتىك جەلىدەگى ادەمى ءدىني سوزدەردىڭ ارتىندا جاسىرىن ناسيحات بولۋى مۇمكىن
وسىنداي ويىن الماتى گۋمانيتارلىق كوللەدجىنىڭ ستۋدەنتتەرىنە ءدىنتانۋشى، ماگيستر نۇرمۇحاممەد مەيمانقوجا جەتكىزدى، دەپ حابارلايدى قازاقپارات ءتىلشىسى.
بۇل كەزدەسۋگە گۋمانيتارلىق كوللەدجدە ءبىلىم الىپ جاتقان 45 ستۋدەنت قىز قاتىستى. سپيكەر دىندەگى قىز بالالارعا قاتىستى ماسەلەلەردى ايتتى.
«جاستار دەسترۋكتيۆتى اعىمدارعا ەرمەس ءۇشىن نە ىستەۋى كەرەك؟ عالامتورداعى اقپاراتقا اباي بولۋى كەرەك. يسلام ءدىنىن ماقتاپ جازاتىن ناقىل سوزدەر، حاديستەر جازىلعان كەرەمەت اككاۋنتتار بولۋى مۇمكىن. ادامدار سىرلى سوزگە قىزىعىپ كىرەدى. باسىندا ماتىندە ەشقانداي كۇدىك تۋعىزار دۇنيە بولماۋى مۇمكىن. ءبىراق كەيىن دەسترۋكتيۆتى اعىم سايتتارىنا، اقپاراتتىق رەسۋرستارعا سىلتەمەلەر پايدا بولادى. بىلايشا ايتقاندا، جاسىرىن ناسيحات جۇرگىزىلەدى. ال مۇنداي اقپاراتتىق شابۋىلعا جاستار توتەپ بەرە المايدى. سول ءۇشىن ءدىن ماسەلەلەرى بويىنشا كوپ مالىمەت الۋدىڭ كەرەگى جوق»، - دەدى نۇرمۇحاممەد مەيمانقوجا.
سوڭعى مالىمەتتەرگە سەنسەك، سيرياعا قازاقستاننان 800-گە جۋىق ادام كەتكەن. بۇگىندە «جۋسان» وپەراتسياسىنىڭ كومەگىمەن 595 ادام قايتارىلدى.
ونىڭ ايتۋىنشا، جات ەلگە كەتكەندەر ءۇشىن وتان دەگەن ۇعىم قۇندىلىق بولماي قالادى.
«ءتولقۇجاتىن الىپ، كىندىك قانى تامعان جەرىن تارك ەتىپ، حاليفاتتان پانا ىزدەگەندەردىڭ ىشكى دۇنيەسىندە قانداي موتيۆ بولۋى مۇمكىن؟ بۇل ميگراتسيا وتباسى قۇندىلىعىنىڭ تۇككە تۇرمايتىنىن كورسەتتى. سونىمەن قاتار ەر ازاماتتاردىڭ وتباسىن ساقتاۋ، ايەلدىڭ قورعانى بولۋ جانە بالالارىنىڭ ومىرىنە جاۋاپتى ەكەندەرىن ەستەرىنەن شىعارۋلارى اسا قاتتى ويلاندىراتىن ماسەلە بولۋى ءتيىس. كوپ جاعدايدا سيرياعا كەتكەن ايەل زاتى ءوز باسىن قاۋىپكە تىگىپ، كۇيەۋلەرىنىڭ سوڭىنان كەتكەن. بۇل جاعدايدا اسىرەسە جاپا شەككەندەر - بالالار. ولاردىڭ تاعدىرى، جات جەردە جازىقسىز كوز جۇمعان بالالاردىڭ ءولىمى - اتا- اناسىنىڭ جاۋاپكەرشىلىگىندە»، - دەدى سپيكەر.
اۆتور: گۇلميرا عوسمانالي