«التىن القا»، «كۇمىس القا» العان انالار ستۋدەنت اتانۋى ءۇشىن ارنايى كۆوتا بولىنبەك
بۇل تۋرالى بۇگىن ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«حالىقتىڭ الەۋمەتتىك از قامتىلعان توبىن قولداۋ ماقساتىندا «التىن القا»، «كۇمىس القا» يەلەرىنە گرانت تاعايىنداۋ بويىنشا كۆوتا قاراستىرىلادى»، - دەدى مينيستر سەنات دەپۋتاتتارىنا «پەداگوگ مارتبەسى تۋرالى» زاڭ جوباسىن تانىستىرۋ بارىسىندا.
ونىڭ اتاپ وتۋىنشە، قازىرگى ۋاقىتتا مۇنداي ينستيتۋت ەلىمىزدە قولدانىستا بار. بۇگىندە مۇگەدەكتەر جانە وزگە دە ساناتتاعى ازاماتتارعا جوعارى وقۋ ورنىندا ءبىلىم الۋىنا ارنايى كۆوتا قاراستىرىلعان.
«بىزگە كوپبالالى انالاردى ءونىمدى جۇمىلدىرۋ قاجەت دەپ وتىرمىز. ەگەر مۇنداي نيەت تانىتقان ادامدار بولسا، وندا ولار وقۋعا تۇسە الادى. ۇلتتىق ءبىرىڭعاي تەست تاپسىرۋى، شەكتى بالل الۋى قاجەت. دەگەنمەن، ولاردىڭ كۆوتاسى بولادى جانە قانداي دا ءبىر جەڭىلدەتىلگەن شارتتارمەن جوعارى وقۋ ورىندارىنا تۇسۋگە مۇمكىندىك الادى. بۇل رەتتە ونلاين وقۋ بويىنشا دا نورما بار»، - دەدى اسحات ايماعامبەتوۆ.