اقتوبەدە «جان سەرىگىم - دومبىرا» ءداستۇرلى ءانشى- جىرشىلاردىڭ بايقاۋى باستالدى

اقتوبە. قازاقپارات - اقتوبەدەگى «جان سەرىگىم - دومبىرا» ءداستۇرلى ءانشى- جىرشىلاردىڭ بايقاۋىنا قاتىسۋشىلار قىزىل تۇردالى ۇلى، سارى باتاق ۇلى، ناۋرىزبەك جىراۋ، تاڭىربەرگەن مولداباي، شەرنياز جارىلعاس ۇلى سياقتى اقتوبە وڭىرىنەن شىققان اقىن- جىراۋلاردىڭ شىعارمالارىن ورىندايدى،

 دەپ حابارلايدى قازاقپارات ءتىلشىسى.

«بولاشاققا باعدار: رۋحاني جاڭعىرۋ» باعدارلاماسىنىڭ جالعاسى «ۇلى دالانىڭ جەتى قىرى» ماقالاسىن جۇزەگە اسىرۋ ماقساتىندا ع. جۇبانوۆا اتىنداعى اقتوبە وبلىستىق فيلارمونيانىڭ 75 جىلدىعى، اقتوبە قالاسىنىڭ 150 جىلدىعىنا وراي «جان سەرىگىم- دومبىرا» ءداستۇرلى ءانشى- جىرشىلاردىڭ رەسپۋبليكالىق بايقاۋى ءوتىپ جاتىر. بايقاۋعا باتىس قازاقستان، ماڭعىستاۋ، اتىراۋ، قىزىلوردا، اقتوبە وبلىستارىنان جانە نۇر- سۇلتان قالاسىنان ۇمىتكەرلەر قاتىسادى.

 «حالىق ىقىلاسىنا بولەنگەن داڭقتى ونەر يەلەرى قىزىل تۇردالى ۇلى، سارى باتاق ۇلى، ناۋرىزبەك جىراۋ، تاڭىربەرگەن مولداباي، شەرنياز جارىلعاس ۇلى، نۇرپەيىس بايعانين، باكىر تاجىبايەۆ سەكىلدى اقتوبە وڭىرىنەن شىققان اقىن- جىراۋلاردىڭ، سازگەرلەردىڭ شىعارمالارىن كەڭىنەن ناسيحاتتاۋ، جاس ورىنداۋشىلاردىڭ ونەرىن دامىتۋ ماقساتى كوزدەلدى. بۇرىن ايماقتىق ەدى، مادەنيەت جانە سپورت مينيسترلىگى، وبلىس اكىمدىگى، مادەنيەت باسقارماسىنىڭ قولداۋىمەن رەسپۋبليكانى قامتىپ وتىر. تەك 18-35 جاس ارالىعىنداعى ونەرپازداردان ءوتىنىش قابىلداندى»، - دەدى وبلىستىق فيلارمونيانىڭ ديرەكتورى ەلۋباي كەنجاليەۆ. 

ءادىلقازىلار قۇرامىندا ءانشى ع. قۇرمانعاليەۆتىڭ شاكىرتى حايدار وتەعاليەۆ، بەلگىلى جىرشى، كۇيشى ەلدوس ەمىل بار. 

«بايقاۋ - ادامنىڭ كوڭىلىنە دەمەۋ بەرەتىن، مەدەۋ بەرەتىن نارسە. ەلدىڭ نەگىزگى رۋحاني ءدىڭى ونەر بولعاندىقتان وسىنى ارداقتاپ، بولاشاققا جەتكىزۋ پارىز. قازاقستاننىڭ بارلىق وڭىرىندە بار، دەگەنمەن ماڭعىستاۋ، قىزىلوردا، اقتوبە، ورالدا جىرشىلىق ءالى ولگەن جوق. بايقاۋ ۇلتتىق ونەردى ساقتاپ قالۋعا، دامىتۋعا سەپتىگىن تيگىزەرى ءسوزسىز»، - دەدى بەلگىلى جىرشى، كۇيشى ەلدوس ەمىل.

اۆتور: التىناي ساعىندىقوۆا