ميتينگكە بالامەن بارعاندارعا جاۋاپكەرشىلىك كۇشەيتىلمەك
بۇگىن پارلامەنت سەناتىنىڭ جالپى وتىرىسىندا قارالعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت جانە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا وسىنداي تۇزەتۋ ەسكەرىلگەن.
«بالالاردىڭ قۇقىقتارىن قورعاۋ، ولاردىڭ دەنساۋلىعى مەن قاۋىپسىزدىگىنىڭ اسا ماڭىزدىلىعىن ەسكەرە وتىرىپ، سونداي-اق ميتينگىلەر تۋرالى زاڭنامانى جەتىلدىرۋ ماقساتىندا كامەلەتكە تولماعانداردى رۇقسات ەتىلمەگەن جيىندارعا تارتقانى جانە ولاردى پايدالانعانى ءۇشىن اكىمشىلىك جاۋاپكەرشىلىكتى كۇشەيتۋ ۇسىنىلدى»، - دەدى پارلامەنت سەناتى كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ مۇشەسى نۇرلان بەكنازاروۆ.
وتىرىستا زاڭ جوباسىنا قاتىستى ۇسىنىلعان مالىمەتتەردە اتالعان ماسەلە بويىنشا ايىپپۇل مولشەرى كورسەتىلگەن.
«كامەلەتكە تولماعان ادامدى قازاقستان رەسپۋبليكاسىنىڭ زاڭناماسىن بۇزا وتىرىپ وتكىزىلگەن جيىندارعا، ميتينگىلەرگە، شەرۋلەرگە، دەمونستراتسيالارعا جانە قوعامدىق، توپتىق نەمەسە جەكە مۇددەلەر مەن قارسىلىق ءبىلدىرۋدىڭ كورسەتىلگەن نىساندارىندا پايدالانۋ - ءجۇز ايلىق ەسەپتىك كورسەتكىش مولشەرىندە ايىپپۇل سالۋعا نە ون تاۋلىككە دەيىنگى مەرزىمگە اكىمشىلىك قاماققا الۋعا الىپ كەلەدى»، - دەلىنگەن تۇسىندىرمە ماتەريالدا.
مۇنداي نورمانىڭ ەنگىزىلۋىنە ازاماتتاردىڭ سانكتسيالانباعان ميتينگكە كامەلەتكە تولماعان بالالارمەن شىعۋ فاكتىلەرى بار ەكەنى اتاپ وتىلگەن. سول ارقىلى ولار كامەلەكەت تولماعانداردىڭ دەنساۋلىعىنىڭ فيزيكالىق جانە پسيحيكالىق تۇرعىدان ورنىقتى دامۋىنا نۇقسان كەلتىرەدى.
وسىعان بايلانىستى رۇقسات بەرىلمەگەن اكتسيالارعا كامەلەكەتكە تولماعان ادامداردى تارتقانى ءۇشىن اكىمشىلىك جاۋاپكەرشىلىكتى قولدانۋ ۇسىنىلىپ وتىر.
اۆتور: رۋسلان عابباسوۆ