باقىتتى بولۋدىڭ سىرى
ومىردەگى ءار پەندە باقىتتى بولۋعا ىنتىق. ءبىراق وعان جەتۋدىڭ جولى قاراپايىم ەمەس-تى. فرانسۋز جازۋشىسى گيۋگو ايتقانداي «شىن باقىتتى بولۋ ءۇشىن- باقىتتى سەزىنۋ جەتكىلىكسىز، ادام باقىتقا لايىقتى بولۋى كەرەك».
وعان لايىقتى بولۋ ءۇشىن ەڭبەك ەتۋگە تۋرا كەلەدى، سوندا ءار ادامعا ءوزىنىڭ باقىتىنىڭ قۇپياسى اشىلادى. ول ءۇشىن پسيحولوگتار ۇسىنعان مىنا قاعيدالاردى ومىرىڭىزگە ەنگىزە ءجۇرىڭىز، سوندا ءسىز باقىتتى سەزىنۋدىڭ قۇپياسىن تاباسىز.
- باقىتتى بولۋ ءۇشىن ادام ءاردايىم وپتيميست بولۋ كەرەك. قيىندىققا تاپ بولساڭىز، قايعىرۋدى ەمەس، ودان شىعار جولدى ىزدەڭىز. قاتەلىك جاساساڭىز، ساباق الىڭىز. ءاردايىم جاقسىلىقتان ءۇمىتتى بولىڭىز.
- ءار ۋاقىتتا كۇلىپ ءجۇرىڭىز. وزىڭىزگە عانا ەمەس، وزگەلەرگە دە باقىت سىيلاۋ ارقىلى، ءوزىڭىزدى الدەقايدا جەڭىل، ءارى كوتەرىڭكى كوڭىل- كۇيدە سەزىنەتىن بولاسىز.
- بارىڭىزعا قاناعات ەتىڭىز. قولىڭىزداعى ىسىڭىزگە، اينالاڭىزداعى دۇنيەلەر مەن جانداردىڭ بارىنا كوڭىلىڭىز تولسىن. «مەندە نەگە ونداي جوق»، «نەگە مەنىڭ ءومىرىم وزگەلەرگەي ەمەس» سىندى ويدان اۋلاق بولىڭىز. بۇل ءسىزدىڭ بويىڭىزداعى وپتيميستىككە قارسى كەلەتىن بولادى.
- ءوزىڭىزدى وزگەلەردەن سالىستىرۋدان اۋلاق بولىڭىز. وزگەلەرگە ەلىكتەۋدىڭ قاجەتى جوق. ءوزىڭىزدى سۇيە ءبىلىڭىز. ءسىز-جاقسىسىز ءارى كەرەمەتسىز. تابيعي قالىپىڭىزدى ساقتاي الىڭىز. ءوزىن سۇيگەن ادام - باقىتتى ەكەنىن ەستە ساقتاڭىز.
- بويىڭىزدا قانداي كەمشىلىك بار، سونى جوندەۋگە ىنتىق بولىڭىز. اينالاڭىزعا مەيىرىممەن قاراۋعا، جاقسىلىق جاساۋعا، قامقور بولۋعا تىرسىڭىز.
- ءوزىڭىزدى دامىتىڭىز. جاڭا قىرىنان ءوزىڭىزدى ۇشتاۋعا كۇش سالىڭىز. سىرت كەلبەتپەن قاتار، ىشكى الەمىڭىزدە دە وزگەرىستەر ورناسىن. جاڭا كىتاپ وقىڭىز، ساياباقتا جەكە سەرۋەن قۇرىپ، ويىڭىزدى ىشىڭىزدەن تالقىلاپ، بولاشاققا ماقسات قۇرىڭىز. ءبىر ورىندا قالماڭىز.
- باقىتتىڭ باستى ەلەمەنتى - وتباسى ءارى ءسىزدىڭ دوستارىڭىز. ءسىزدى كەز-كەلگەن جايتتا قولدار جاندارمەن جاقىن قارىم- قاتىناستا بولىڭىز. كوبىرەك ۋاقىتتى وسى جاندارمەن وتكىزىڭىز. ولار ءبىزدىڭ قانداي جاعداي بولماسىن قاسىمىزدان تابىلار جاناشىرلارىمىز.
مىنەكەي، باقىتتىڭ سىرى وسىلاردا. ءبىر قىزىعى ءار ادام وسى قاعيدالاردى ومىرىنە ەنگىزە ءجۇرىپ، سانالارىنا ءارتۇرلى تۇسىنىك قالىپتاستىرادى. بىلايشا ايتقاندا، اركىم ءوزى ءۇشىن باقىت سىرىن اشادى. ءسىز دە ءوزىڭىز ءۇشىن بەيمالىم سىردى اشىپ، باقىت ءدامىن تاتىڭىز! باقىتتى بولۋدى ارمانداماڭىز، ارەكەت ەتىڭىز!