سىرعانى قالاي تاڭداۋ كەرەك؟

نۇر-سۇلتان. قازاقپارات – سىرعا - ايەلدىڭ بەتىن ادەمى قىپ ارلەيتىن زات. سوندىقتان سىرعانى تاڭداعاندا، قايسى ادەمى بولسا، سونى ەمەس، وزىڭىزگە ۇيلەسەتىنىن تاڭداۋعا تىرىسىڭىز.

الدىمەن بەتتىڭ پىشىنىنە نازار اۋدارامىز. سىرعا تاڭداعاندا، سىرعانىڭ ءپىشىنى مەن ونىڭ تاسىنا ءمان بەرگەن ءجون.

مىسالى دوڭگەلەك، ۇلكەن تيەك ىسپەتتى سىرعالار بەتتى سىرت كوزگە ۇلكەيتىپ كورسەتەدى. دوڭگەلەك ءپىشىندى بەتكە ۇزىن سىرعالار ادەمى جاراسادى. بەتى ۇزىن ءپىشىندى نازىك جاندىلاردىڭ دومالاق سىرعالاردى تاققاندارى ءجون.

سارى شاشتى، كوزىنىڭ ءتۇسى اشىق قىزدار اشىق تاستارى بار سىرعالاردى، ال قارا كوزدىلەر جىلى تۇستەس تاستارى بار سىرعالاردى تاققانى ءجون. قارا شاشتىلارعا اشىق ءتۇستى تاسى بار سىرعالار جاراسادى. التىن سىرعالار بارلىق قىزدارعا ۇيلەسە كەتەدى.

جۇمىسقا

جۇمىسقا ءسىزدىڭ ىسكەرلىك وبرازىڭىزدى اشاتىن سىرعا تاڭداۋ كەرەك. ول الىستان كوز تارتاتىنداي بولماعانى دۇرىس. كەڭسەگە كىشكەنتاي دوڭگەلەك سىرعالار، ۇقىپتى تۇراتىن گاۋھار تاستى سىرعالاردى تاعۋعا بولادى.

كەشكى وتىرىس

جارقىراعان قىمبات سىرعالاردى كەشكى وتىرىستارعا، تەاترعا، قوناققا بارعاندا تاعىپ بارعان ءجون. جالت- جۇلت ەتكەن اشەكەي كەشكى وتىرىستىڭ اجارىن اشادى. ولار جۇمىس كۇنىندە، كۇندىزگى ۋاقىتتا ءوزىنىڭ اجارىن جوعالتىپ الادى. كەشكى وتىرىسقا تاعىپ باراتىن سىرعاڭىز مىندەتتى تۇردە كوزگە تۇسەتىندەي بولۋى كەرەك.

قايتالانبايتىن ءىس-شارالارعا

ەگەر ءسىز ارنايى كەزدەسۋلەرگە، كوپتەن كۇتكەن ەرەكشە شارالارعا باراتىن بولساڭىز، ەتيكەتتى ساقتاڭىز. مۇمكىندىگىنشە، سىرعاڭىز قىمبات مەتالدان جاسالىپ، ءسىزدىڭ اشەكەيلەرىڭىزبەن سايكەسۋى كەرەك. وسىنداي اسا قىمبات سىرعالاردىڭ تىم قۇرىسا بىرەۋى ءسىزدىڭ اكسەسسۋارلارىڭىزدىڭ اراسىندا بولسا، قايتالانباس كەشتەرگە وسى سىرعانى ۇيالماي تاعىپ بارا الاسىز.

كۇندەلىكتى تاعاتىن سىرعا

وبرازىڭىزعا ساي كەلەتىن سىرعانى تاڭداڭىز. كەشكى وتىرىسقا تاعىلاتىن سىرعانى سۋپەرماركەتتە تاعىپ جۇرسەڭىز، ءسىزدىڭ تالعامىڭىزعا سىن. سوندىقتان، قانداي سىرعانى تاڭداساڭىز دا، كوشەنىڭ اتموسفەراسىمەن ساي كەلسىن.

قىمبات سىرعالار

سىرعا قىمبات مەتالدان دا، ارزان مەتالدان دا جاسالادى. كۇمىستەن، التىننان، پلاتينادان جانە پلاتينا مەتالدارىنان (پاللاديي، رۋتەني، وسمي، رودي، يريدي) جاسالعان سىرعالار قىمبات سىرعالار بولىپ ەسەپتەلەدى. بۇلاردىڭ باعاسى دا سايكەسىنشە قىمبات. سوندىقتان، وسىنداي سىرعالاردى ساتىپ العاندا، مىندەتتى تۇردە سىناقتان وتكىزىڭىز.

قىمبات سىرعالاردىڭ سىنامالارى:

التىن: 999، 958، 750، 585، 500، 375.

كۇمىس: 999، 960، 925، 875، 830، 800.

پلاتينا: 950، 900، 850.

پاللادي: 850، 500.