08:42, 10 - قازان 2019 | GMT +6
قازاقستاندىقتار قىركۇيەك ايىنداعى ەڭ ۇزدىك سپورتشىلارىن انىقتادى
نۇر-سۇلتان. قازاقپارات - قازاقستان ۇلتتىق وليمپيادالىق كوميتەتىنىڭ رەسمي سايتىندا «قىركۇيەك ايىنىڭ ەڭ ۇزدىك سپورتشىسىنا» داۋىس بەرۋ اياقتالدى، دەپ حابارلايدى قازاقپارات.
بۇعان دەيىن حابارلاعانىمىزداي، قىركۇيەك ايىنىڭ ۇزدىگى اتانۋعا 6 سپورتشى ۇمىتكەر بولدى. ولار: بەكزاد نۇرداۋلەتوۆ (بوكس)، قامشىبەك قوڭقابايەۆ (بوكس)، نۇرقوجا قايپانوۆ (ەركىن كۇرەس)، داۋلەت نيازبەكوۆ (ەركىن كۇرەس)، يگور سون (اۋىر اتلەتيكا) جانە حورلان جاقانشا (گرەك-ريم كۇرەسى).
olympic.kz سايتىندا 1 -قىركۇيەك كۇنى باستالعان داۋىس بەرۋ 9 -قازاندا اياقتالدى. ناتيجەسىندە، 43,07 پايىزبەن بەكزات نۇرداۋلەتوۆ توپ جاردى. 23,34 پايىزبەن حورلان جاقانشا ەكىنشى ورىنعا جايعاسسا، 22,08 داۋىس جيناعان نۇرقوجا قايپانوۆ ءۇشىنشى ورىنعا يە بولدى.