قازاقستاننىڭ سۋ سپورتى تۇرلەرى فەدەراتسياسىنا جاڭا پرەزيدەنت سايلاندى
ايتا كەتسەك، اندرەي كريۋكوۆ بۇرىن اتالمىش فەدەراتسيانىڭ باس حاتشىسى قىزمەتىن اتقارعان.
«مەنىڭ ۇلتتىق وليمپيادا كوميتەتىن باسقاراتىنىمدى بىلەسىزدەر. مادەنيەت جانە سپورت مينيسترلىگىنىڭ بۇيرىعىنا سايكەس، 2018 -جىلدان باستاپ ۇوك جوعارى ناتيجەلەرى بار سپورت تۇرلەرىن قارجىلاندىرۋ ءىسىن الىپ جۇرەدى. ەتيكا مەن مۇددەلەردىڭ سوقتىعىسپاۋىن ەسكەرە وتىرىپ، سۋ سپورتى تۇرلەرى فەدەراتسياسىنىڭ باسشىلىعىنان كەتكەنىم ءجون دەپ شەشتىم»، - دەدى تيمۋر قۇلىبايەۆ فەدەراتسيانىڭ ەلوردادا وتكەن بۇگىنگى وتىرىسىندا.
ونىڭ ايتۋىنشا، الداعى وليمپيادا ويىندارىندا التىن مەدالعا ۇمىتتىلەردىڭ ءبىرى - دميتري بالاندين. قازىرگى ۋاقىتتا ول ا ق ش-تا دايىندالىپ جاتىر.
«ا ق ش-تا دايىندالىپ جاتقان سپورتشىلارعا قىرۋار قارجى ءبولىنىپ جاتىر. ءۇمىت اقتالار دەگەن سەنىمدەمىن. ال مەن ءوز ورنىما اندرەي كريۋكوۆتى ۇسىنامىن»، - دەدى قۇلىبايەۆ.
فەدەراتسيا مۇشەلەرىنىڭ ءبارى ءبىر اۋىزدان ۇسىنىلعان ۇمىتكەردى قولداپ داۋىس بەردى.
ەسكە سالا كەتسەك، قازاقستان بوكس فەدەراتسياسىنىڭ بۇگىنگى وتىرىسىندا تيمۋر قۇلىبايەۆ اتالمىش فەدەراتسيا باسشىلىعىنان كەتەتىنىن مالىمدەگەن بولاتىن. ونىڭ ورنىنا بەلگىلى قازاقستاندىق بيزنەسمەن كەڭەس راقىشەۆ سايلاندى.
اۆتور: ايان بەكەن ۇلى