ەلوردادا جىل سوڭىندا گاز بەرىلە باستايدى

نۇر- سۇلتان. قازاقپارات - نۇر- سۇلتان قالاسى جانىندا «سارى ارقا» ماگيسترالدى گاز قۇبىرىن سالۋ بويىنشا قۇبىرلاردى دانەكەرلەۋدىڭ سوڭعى كەزەڭى اياقتالدى، دەپ حابارلايدى قازاقپارات ءتىلشىسى.

«ەلباسىنىڭ 5 الەۋمەتتىك باستاماسى نەگىزىندە، ەلورداعا گاز جەتكىزۋ ماقساتىندا، بىلتىرعى جىلدىڭ جەلتوقسان ايىندا «سارى ارقا» ماگيسترالدى گاز قۇبىرىن سالۋ باستالدى. ال دانەكەرلەۋ جۇمىستارى ۇستىمىزدەگى جىلدىڭ ناۋرىز ايىندا قولعا الىنىپ، بۇگىن مىنە 1061 شاقىرىمدىق گاز قۇبىرىنىڭ جۇمىسى ءوز مارەسىنە جەتتى. ەندى ۋاقىتتا تەحنيكالىق جۇمىستارى قالدى، ول قاراشا ايىندا اياقتالىپ، جەلتوقساندا گاز بەرىلە باستايدى. ودان ءارى قالا اكىمدىگى ءتيىستى ورگاندارمەن بىرىگە وتىرىپ ەلوردانى تولىق گازبەن قامتۋعا مۇمكىندىگى بار. بۇل ەلىمىزدە جۇزەگە اسىرىلعان ءىرى ينفراقۇرىلىمدىق جوبالاردىڭ ءبىرى بولىپ تابىلادى. بۇل جوبانىڭ ماقساتى - ەلوردامەن قاتار، وعان جاقىن وبلىستار مەن ەلدى مەكەندەردى گازبەن قامتاماسىز ەتۋ»، - دەدى «سامۇرىق- قازىنا» ا ق باسقارما ءتوراعاسى احمەتجان ەسىموۆ.

ونىڭ مالىمدەۋىنشە، اتالعان گاز قۇبىرى قىزىلوردا- جەزقازعان- قاراعاندى- تەمىرتاۋ- نۇر- سۇلتان مارشرۋتى بويىنشا تارتىلعان.

«ماگيسترالدى سالۋعا 2 مىڭنان استام ادام اتسالىستى. بۇل رەتتە، بارلىق قۇرىلىس جۇمىستارى ەڭبەكتى قورعاۋ تالاپتارىنا قاتاڭ سايكەستىكتە جۇرگىزىلدى. بۇگىنگى تاڭدا، كەستەگە سايكەس، جەزقازعان، قاراعاندى، تەمىرتاۋ مەن نۇر- سۇلتان قالالارىندا گاز ولشەۋ ستانسياسى مەن 5 گاز تاراتۋ ستانسياسىن سالۋ جۇمىستارى جۇرگىزىلۋدە»، - دەدى ول.

سونداي- اق، ا. ەسىموۆ ەلىمىزدىڭ باسقا دا وڭىرلەرىندە گازداندىرۋ پروتسەسىنىڭ ودان ءارى كەزەڭ- كەزەڭمەن جانە جوسپارلى تۇردە دامىتۋ كوزدەلگەنىن ايتىپ ءوتتى.

اۆتور ءالي يبرايەۆ