«سەرگەك» كامەراسى جۇرگىزۋشىلەردەن ايىپپۇل الۋ ءۇشىن عانا قولدانىلۋدا – ق ر پرەزيدەنتى

نۇر-سۇلتان. قازاقپارات - «سەرگەك» جوباسى قوعامدىق قاۋىپسىزدىكتى ارتتىرۋ ءۇشىن تولىق كولەمدە پايدالانىلماي وتىر.

بۇل تۋرالى نۇر-سۇلتان قالاسىنىڭ اكىمدىگىندە وتكەن ەلوردانى ودان ارى دامىتۋ ماسەلەلەرى جونىندەگى ماجىلىستە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«ەلوردادا بەتى اشىلعان ەسىرتكى قىلمىستارى 7 پايىزعا ارتقانى بايقالادى. مەن جولداۋىمدا ەسىرتكى تاراتۋمەن جانە ساتۋمەن اينالىساتىن تۇلعالارعا قاتىستى قىلمىستىق جاۋاپكەرشىلىكتى كۇشەيتۋ قاجەتتىگى تۋرالى ايتقان ەدىم. تاياۋ ۋاقىتتا ۇكىمەت دەپۋتاتتىق كورپۋسپەن بىرگە زاڭنامامىزعا ءتيىستى وزگەرتۋلەر ەنگىزەدى دەپ كۇتەمىن»، - دەدى مەلەكەت باسشىسى.

قازاقستان پرەزيدەنتى ەسىرتكى ديلەرلەرىن قاتاڭ جازالاۋ قاجەتتىگىن باسا ايتتى. سونىمەن قاتار ەلوردادا جول اپاتىنىڭ ۇلعايىپ كەتكەندىگىنە نازار اۋدارتتى.

«جول-كولىك اپاتتارىنىڭ سانى 15,5 پايىزعا، ولاردان زارداپ شەككەندەر 42 پايىزعا كوبەيدى. اۆتوكولىكتەردى ۇرلاۋ 20 پايىزعا ارتتى. دابىل قاعارلىق دەرەكتەر. قۇقىققورعاۋ ورگاندارى جاعدايدى جاقسارتۋ بويىنشا قاجەتتى شارالاردى قابىلداۋعا مىندەتتى. «سەرگەك» جوباسى قوعامدىق قاۋىپسىزدىك دەڭگەيىن ارتتىرۋ ءۇشىن تولىق كولەمدە پايدالانىلمايدى. باسىمدىق جۇرگىزۋشىلەردەن ايىپپۇل ءوندىرىپ الۋعا عانا جاسالىپ وتىر. ال اكىمدىك پەن بۇكىل ۇكىمەتتىڭ مىندەتى - بۇل بۇكىل قالانى سيفرلاندىرۋ»، - دەدى ق. توقايەۆ.

اۆتور: مارلان جيەمباي