رەسەيدەگى قورعان وبلىسىنىڭ ماكۋشين اۋدانىندا العاشقى قازاق سىنىبى اشىلدى
قورعان وبلىسىندا بۇگىندە 12 مىڭعا جۋىق ەتنيكالىق قازاق تۇرادى. ەرەسەكتەر جاعى انا ءتىلىن جانە ۇلتتىق مادەنيەتتى ۇكىمەتتىك ەمەس ۇيىمداردىڭ قۇرامىندا قوعامدىق قىزمەتتى جۇزەگە اسىرۋ بارىسىندا قولدانۋعا مۇمكىندىك السا، بالالارعا قازاق ءتىلىن مەڭگەرۋ قيىندىق تۋدىراتىن. بۇل ماسەلە ەندى شەشىمىن تاۋىپ وتىر.
قازاقستان حالقى اسسامبلەياسىنىڭ وبلىستىق فيليالىنىڭ مالىمەتىنشە، يگى باستاماعا قورعان وبلىسى قازاقتارىنىڭ ۇلتتىق- مادەني اۆتونومياسىنىڭ ءتوراعاسى قايرات ورالوۆ مۇرىندىق بولدى. ماكۋشين اۋدانىندا قازاق سىنىبىنىڭ اشىلۋ سالتاناتىنا وڭىردەن تىلدەردى دامىتۋ جونىندەگى باسقارما، «دۇنيەجۇزى قازاقتارى قاۋىمداستىعى» رەسپۋبليكالىق قوعامدىق بىرلەستىگىنىڭ وبلىستىق فيليالى جانە «قوعامدىق كەلىسىم» كمم وكىلدەرى كىرگەن دەلەگاتسيا باردى.
ءىس- شاراعا قاتىسۋشىلار قازاقستان مەن رەسەي وڭىرلەرى اراسىنداعى شەكارالىق ىنتىماقتاستىقتى نىعايتۋ بويىنشا ماڭىزدى ماسەلەلەردى تالقىلادى.
«قازاقى ءداستۇر بويىنشا سىنىپ وقۋشىلارى مەن ولاردىڭ اتا-انالارى ءبىزدى شاشۋ شاشىپ قارسى الدى. قازاق سىنىبىنىڭ اشىلۋى ەلدەگى ۇلتارالىق كەلىسىمدى بەكىتەدى، ەكى وبلىستىڭ عانا ەمەس، قازاقستان مەن رەسەي اراسىنداعى دوستىق قارىم- قاتىناستى دامىتادى. مۇنداي ءىس- شارالار الەۋمەتتىك- ساياسي، ءبىلىم بەرۋ، دەنساۋلىق ساقتاۋ جانە مادەنيەت سالالارىندا ءوزارا تاجىريبە الماسۋعا مىقتى تۇعىرناما»، - دەيدى دەلەگاتسيا مۇشەلەرى.
سولتۇستىك قازاقستاندىقتار رەسەي قازاقتارى ءۇشىن قۇندى سىيلىق - قازاق ءتىلىن ۇيرەنۋ بويىنشا عىلىمي- ادىستەمەلىك ادەبيەتتەردى ۇسىندى. وقۋ قۇرالدارىنىڭ 50 گە جۋىق داناسى وقۋشىلارعا ءتىلدى ءتيىمدى جانە تەرەڭدەتىپ وقۋعا مۇمكىندىك بەرمەك.
اۆتور: اقەركە داۋرەنبەك قىزى