استرولوگ مامان قازان ايىندا قازاقستاندىقتاردى نە كۇتىپ تۇرعانىن ايتتى

None
None
نۇر-سۇلتان. قازاقپارات- مامان الداعى ايعا بولجام جاساپ، قاي كۇندەر ءساتتى بولاتىنىن جانە قاي ۋاقىتقا جوسپار قۇرماعان ءجون ەكەنىن ايتىپ بەردى.

قازاقستاندىق استرولوگ يرينا ابدرايموۆا قازان ايىنا بولجام جاسادى، دەپ حابارلايدى Sputnik قازاقستان ءتىلشىسى.

ساياساتتا شيەلەنىس بولادى

استرولوگتىڭ ايتۋىنشا، قازىرگى كەزدە ءۇش پلانەتا رەتروگرادتى باعىتتا اينالىپ جاتىر. بۇل دەگەنىمىز، ءاربىر پلانەتانىڭ وربيتاسى ءارتۇرلى بولعاننان كەيىن بىرەۋى ەكىنشىسىنىڭ الدىنا ءتۇسىپ وتىرادى دا، ارتتا قالعانى كەرى اينالىپ جاتقان بولىپ كورىندى. ونى «رەتروگرادتى قوزعالىس» دەپ اتايدى.

«الايدا 3 -قازاندا پلۋتون رەتروگرادتى قوزعالىستان شىعادى. دەمەك، جىلدىڭ باسىندا بولعان وقيعالار ءوز جالعاسىن تاۋىپ، 2020 -جىلدىڭ اقپان ايىنا دەيىن ءوربيدى. ول، اسىرەسە، 11 ى جانە 14 ى كۇندەرى دۇنيەگە كەلگەن ادامدارعا قاتىستى بولادى. جالپى، باياۋ قوزعالاتىن پلانەتالاردىڭ بارلىعى بىرتىندەپ رەتروگرادتى قوزعالىستان شىعادى. بۇل دەگەنىمىز، ءبىزدى وتە قىزىقتى وقيعالار كۇتىپ تۇر. الەمدەگى ساياسي وقيعالار شيەلەنىسە تۇسەدى. سونىڭ العاشقى ناتيجەسىن كەلەسى جىلدىڭ باسىندا كورەتىن بولامىز. ەندى، ونى كەلەسى جولى ايتىپ بەرەمىن. ازىرشە، الداعى ايدى ايتايىق»، - دەيدى ابدرايموۆا تىلشىگە  بەرگەن سۇحباتىندا.

ونىڭ سوزىنە قاراعاندا، قازاننىڭ باسىندا وكپە-ناز، قىزعانىش، رەنىش، ءتىپتى ءتۇڭىلۋدىڭ قاۋپى بار. ادامنىڭ بويىندا الاڭداۋشىلىق، ال قارىم-قاتىناستا كەلىسپەۋشىلىكتەر بولۋى مۇمكىن. ونىڭ ارتى داۋ- جانجالعا ۇلاسادى. سوندىقتان 1 -قازاننان باستاپ جاقىن ادامدارمەن، اسىرەسە، سۇيىكتىلەرىڭىزبەن داۋلاسىپ، ابىروي تابامىن دەپ ويلاماڭىز. ودان دا ارىپتەستىك ءارى ىسكەرلىك بايلانىستاردى كۇشەيتۋگە باسىمدىق بەرگەن دۇرىس. اليمەنت مەن مۇراعا قاتىستى ماسەلەلەر تۋىندايتىن شىعار.

«ءبىز ادامنىڭ كەمشىلىگىن ايتۋعا بەيىم تۇراتىن بولامىز. اڭگىمە كەزىندە ونى تۇيرەپ الۋعا تىرىسامىز. ءاربىر نارسەنىڭ تۇبىنە جەتەمىز دەپ، بىرەۋدى كەكەتىپ، رەنجىتىپ الۋىمىز ابدەن مۇمكىن. الايدا ميدىڭ جۇمىسى باياۋلامايدى. سوندىقتان قيىن ماقسات- مىندەتتەردى جىلدام شەشۋگە مۇمكىندىك بولادى»، - دەيدى ابدرايموۆا.

كرەديت الۋعا اسىقپاڭىز

ال قارجى نارىعىندا جۇمىس قىزا تۇسەدى. بانكتەر كرەديت مەن قارىزداردىڭ جارناماسىن كۇشەيتىپ، سان الۋان اكتسيالاردى كوبىرەك وتكىزەتىن بولادى. سوندىقتان كرەديت الۋ جاعىنان بارىنشا ساقتىق تانىتقان ءجون. سەبەبى قارىزعا كىرگەننەن كەيىن ونى بىرنەشە جىل بويى قايتارا الماۋىڭىز مۇمكىن.

«5 -قازاننان باستاپ ەنەرگەتيكا ءسال تومەندەيدى. ءبىز ءبارىن ساراپتاپ جاسايتىن بولامىز. بىلايشا ايتقاندا، ديپلومات بولۋعا تۋرا كەلەدى. دەگەنمەن، ونىڭ ءوزى قيىنعا سوعادى. سەبەبى ناقتى شەشىم قابىلداۋ وڭاي بولمايدى. «ءيا» نەمەسە «جوق» دەگەن جاۋاپتى بىردەن بەرە المايمىز. ەنەرگيانىڭ جەتىسپەۋشىلىگى سەزىلەدى»، - دەيدى استرولوگ.

6 -قازاندا كۇيگەلەكتىك سەزىلەدى. ال ەرتەسىندە ول قىزبالىققا ۇلاسۋى ابدەن مۇمكىن. ادامنىڭ كوڭىل- كۇيى ۇنەمى وزگەرىپ تۇرادى. سودان داۋ- داماي، پىكىرتالاس پەن ەكسترەمالدى ارەكەتكە دەگەن قۇلشىنىسقا بەيىم بولامىز. جۇمىستا كۇتپەگەن ماسەلەلەر تۋىنداۋى مۇمكىن. ادام ىشتەي ەركىن ءارى تاۋەلسىز ومىرگە جاقىن بولادى.

«اسىرەسە، ەر ادامدار ات قۇيرىعىن كەسۋگە دايىن تۇرادى. وسى كۇندەرى ولارعا «سەن انانى، مىنانى ىستەۋگە مىندەتتىسىڭ» دەپ ايتسا، ولار بۇلقان- تالقان بولىپ، «مەن ەشكىمگە قارىزدار ەمەسپىن، ءبىر نارسە ىستەۋگە دە مىندەتتى ەمەسپىن» دەپ شىعۋى مۇمكىن. ونداي ۋاقىتتا ادامدار تەك وزىنىكىن عانا قۇپ كورەدى. جاڭا ءبىر اسەر، يا بولماسا، كۇتپەگەن ءبىر وقيعا ىزدەيمىز دەپ قىزبالىققا سالىنادى. وندايعا جول بەرمەۋ كەرەك»، - دەپ اتاپ كورسەتتى ابدرايموۆا.

ەنەرگيانى كوپ جۇمساماڭىز

8 -قازاندا جەكە ومىرگە نەمەسە جۇمىسقا بايلانىستى دەپرەسسيا بولۋى مۇمكىن. وسىعان بايلانىستى استرولوگ 6-7 سى كۇندەرى ەنەرگيانى كوپ جۇمساماۋعا كەڭەس بەرىپ وتىر. وسى كەزدە تاۋەكەلگە بارىپ، ءبىر نارسەنى شەشۋگە تىرىسپاي- اق قويىڭىز. ادام كۇزگى سارى ۋايىمعا سالىنادى، كوڭىلى جابىرقاۋ بولادى. اسىرەسە، ايدىڭ 6-8 -كۇندەرى دۇنيەگە كەلگەن تاۋەشكى، تارازى، شايان مەن توقتى بەلگىلەرى ءۇشىن وڭاي بولمايدى. الايدا سارى ۋايىمنىڭ دا بەتى قايتادى.

«دەگەنمەن، ەموتسيا ازايمايدى، قايتا كۇشەيە تۇسەدى. 9 -قازاننان باستاپ ىنتىق سەزىمگە دەگەن قاجەتتىلىك بولادى. وعان دا ءبىراز ەنەرگيا جۇمسالادى. سوندىقتان ءوز ەموتسياڭىزدى بارىنشا باقىلاۋدا ۇستاۋعا تىرىسىڭىز»، - دەدى استرولوگ.

ول 12-13 -قازاندا قىمبات زاتتاردى الماۋعا كەڭەس بەرىپ وتىر. سونداي-اق، ۇزاقمەرزىمدى قارىم- قاتىناستار ءۇشىن ءساتسىز ۋاقىت. بۇدان بولەك، كۇدىكتى كەلىسىمدەرگە اقشا سالعان قاۋىپتى.

جەكە ومىردە مۇلىك پەن اليمەنت، ال بيزنەستە قارجىلىق داۋ-دامايلار بولۋى مۇمكىن. جالپى، 7-13 -كۇندەرى ءساتسىز ۋاقىت بولىپ سانالادى. دەگەنمەن، 13 -قازاننان باستاپ جاعداي تۇزەلەدى. ەڭ باستىسى، 14 -قازاندا اگرەسسياعا سالىنباڭىز. بىرەۋدىڭ ىڭعايىنا قاراي ارەكەت ەتۋگە تۋرا كەلەدى. سوسىن سىرتقى فاكتورلار دا جوسپاردى وزگەرتىپ وتىرادى. بۇنىڭ بارلىعى جۇيكەنى توزدىرىپ، كوڭىل- كۇيگە كەرى اسەرىن تيگىزەدى.

سوڭعى كۇندەر ءساتتى بولادى

«نەگىزى، 25 -قازانعا دەيىن ءساتتى كەزەڭ بولادى. ءدال وسى ۋاقىتتا ءبارىن تىندىرىپ الىڭىز. جوسپار قۇرىپ، جاڭا باستامالاردى دا ىسكە اسىرۋعا قورىقپاڭىز. ويتكەنى 30 -قازاننان باستاپ مەركۋرييدىڭ جىلدامدىعى ازايىپ، 31 نەن باستاپ رەتروگرادتى قوزعالىسقا تۇسەدى. ال وندايدا قۇجات راسىمدەۋ، كاسىپورىنداردى تىركەۋ، دۇكەن اشۋ، كەلىسىمدەردى راسىمدەۋ، باعالى قاعازداردى ساتىپ الۋ سياقتى باستامالار ءساتسىز بولۋى مۇمكىن. مەركۋرييدىڭ رەتروگرادتى قوزعالىسى كەزىندە تۋعان ادامدار قورىقپاسا دا بولادى»، - دەپ تولىقتىردى ابدرايموۆا.

ءساتتى كۇندەر - 16,19,20,21 جانە 25. 25 -قازان قارجى ماسەلەلەرى ءۇشىن ءساتتى بولادى. ول كۇنى سىيلىق الىپ، سىياقى ۇتىپ الۋىڭىز مۇمكىن. بىرەۋگە ءبىر كورگەننەن عاشىق بولىپ قالۋىڭىز دا ىقتيمال.

27 -قازان - جاراقاتتار، اگرەسسيا مەن اپاتتار كۇنى. تۋعان كۇندەرى 7-14 -ارالىعىنا تۇسەتىن تاۋەشكى، توقتى، تارازى مەن شايان بيلىككە قۇمار بولىپ، وتە قاتال مىنەز تانىتادى. ال سارىشايان، بيكەش، بالىق پەن تورپاقتار جۇمىستا ناقتى ناتيجەگە جەتە الاتىنىن كورسەتەدى. ولارعا ساتتىلىك تە سەرىك بولادى.

«28 -قازاندا ادام اشۋشاڭدىققا سالىنۋى مۇمكىن. ونداي ارەكەتتەردەن كەيىن قاتتى وكىنىپ قالۋىڭىز ىقتيمال. ەلەكتر ەنەرگياسى، كولىك پەن اۋە قاتىناسى جاعىنان اباي بولۋ قاجەت. ال 29 -قازان كۇنى بۇرىنعى وكپە-نازدى ەسكە ءتۇسىرىپ، ىشتەگىنى رەنجىتكەن ادامعا ايتقىڭىز كەلىپ تۇرادى. وندايعا بارماي-اق قويىڭىز. ءبارىبىر ناتيجەسى بولمايدى. ايدىڭ سوڭعى كۇندەرى ءساتتى بولادى»، - دەپ تۇيىندەدى استرولوگ. 

سوڭعى جاڭالىقتار