ينتەرنەت-الاياقتار جەلىدە جالعان اقپارات تاراتىپ، قازاقستاندىقتاردى ارباماق بولعان
بۇل تۋرالى قازاقپارات «KZ- CERT» كومپيۋتەرلىك قيتۇرقۇلىقتارعا قارسى ارەكەت ەتۋ قىزمەتىنە سىلتەمە جاساپ حابارلايدى.
وتكەن جەكسەنبىدە قازاقستاندىقتار WhatsApp مەسسەندجەرى ارقىلى ارنايى ساۋالنامادان ءوتىپ، KFC كومپانياسىنان 3 تەگىن تۇسكى اس الۋعا بولاتىنى تۋرالى سىلتەمەنى بەلسەندى تۇردە تاراتتى. kfc.com---promo.com/ru/؟free ينتەرنەت-رەسۋرسىنان كەلگەن كۇدىكتى سىلتەمەگە ساراپتاما جۇرگىزۋ جونىندە حابار ق ر اقپاراتتىق قاۋىپسىزدىگىنىڭ Telegram مەسسەندجەرىندەگى ارنايى ارناسى ارقىلى «KZ- CERT» كومپيۋتەرلىك قيتۇرقۇلىقتارعا قارسى ارەكەت ەتۋ قىزمەتىنە جولدانعان.
«KZ- CERT» قىزمەتى تاراپىنان جان-جاقتى جۇرگىزىلگەن تالداۋ ناتيجەسىندە تەكسەرىلگەن ينتەرنەت- رەسۋرس الاياقتىق دەپ تانىلعان. ينتەرنەت-رەسۋرستىڭ الاياقتىعى ونىڭ ساۋالناماسىنان وتكەن ادام وسى اقپاراتپەن ءوزىنىڭ 20 دوسىمەن WhatsApp جانە Viber مەسسەندجەرلەرى ارقىلى ءبولىسۋى كەرەك بولعان. الايدا، رەسۋرس تولىققاندى دايىندالماعاندىقتان سىلتەمەنى تەك WhatsApp ارقىلى تاراتۋ مۇمكىن بولعان.
سىلتەمەنى جىبەرگەن سوڭ ونى تاراتقان ادام ارنايى رەسۋرسقا جىبەرىلىپ، ونىڭ دەمەۋشىلەردىڭ ارنايى سىيلىعىن الۋ ءۇشىن $1500 ۇتىپ الۋعا مۇمكىندىك بەرەتىن ويىنعا قاتىسۋ قۇقىعىنا يە بولعاندىعى ايتىلادى. ارتىنان ويىنعا قاتىسۋشى سىيلىقتى ۇتىپ الادى. ال سىيلىقتى الۋ ءۇشىن بانك كارتاسىنىڭ ءنومىرى كەرەك بولادى.
ارتىنان ۇتىپ الىنعان اقشانى اۋدارۋدا پروبلەمالار پايدا بولادى نەمەسە قارجىنى كونۆەرتاتسيالاۋ قاجەتتىگى تۋىندايدى. ول ءۇشىن سىيلىق يەسى ءتيىستى ورىنعا از عانا اقشا اۋدارۋ كەرەك. اقشا اۋدارۋ ءۇشىن CVC- كودى بار بانك كارتاسىنىڭ مالىمەتتەرىن ەنگىزۋ كەرەك. ال مالىمەتتەر ەنگىزىلگەن جاعدايدا الاياقتار ونى ەركىن پايدالانۋعا مۇمكىندىك الادى.
اۋدارما: ايدار وسپاناليەۆ