اقتوبەدە اۋىل ايەلدەرىنىڭ فورۋمى ءوتتى
ىسكەر ايەلدەر فورۋمىن وبلىس اكىمدىگى، ايەلدەر ىستەرى جانە وتباسىلىق- دەموگرافيالىق ساياسات جونىندەگى كوميسسياسى جانە ىسكەر ايەلدەر كەڭەسى، «جاسىل ەكونوميكانى قولداۋ» جانە «G- Global دامىتۋ كواليتسياسى» زتب- ءى بىرلەسە ۇيىمداستىردى. نەگىزگى ماقسات - ىسكەر ايەلدەردى قولداۋ، تاجىريبە الماسى.
فورۋمعا قاتىسقان «التىن القا» يەگەرى قالامقاس جالمۇحانوۆا 8 بالا تاربيەلەگەن. بارلىعىن دا كىشكەنتايىنان ەڭبەككە ارالاستىرىپ، مال شارۋاشىلىعىنا بەيىمدەگەن. قازىر بيە ساۋىپ، قىمىز ساتىپ وتىر.
«ءبىز قازىر 15 بيە ساۋىپ وتىرمىز. قىمىزدى اۋىلعا كەلىپ، الىپ كەتەدى. بۇل كاسىپكە 25 جىل بولدى. الداعى ۋاقىتتا دا جۇمىستى جالعاستىرىپ، دامىتۋدى كوزدەيمىز. مۇنداي فورۋمعا ءجيى قاتىسىپ ءجۇرمىن. مەنىڭ ويىمشا، ايەلدەر ەر ادامداردىڭ جانىندا ءجۇرىپ كاسىپتە كومەكتەسكەنى دۇرىس. بالالارىم مال باقسا، مەن بيە ساۋدىم. سول ىسكە كەلىندەردى دە ۇيرەتتىم» ، - دەدى قالامقاس جالمۇحانوۆا.
ال بال شارۋاشىلىعىمەن اينالىساتىن نادەجدا ۋسوۆا تاجىريبە الماسۋ ءۇشىن فورۋمعا ارنايى قاتىستى. پەداگوگ جانە زاڭگەر ماماندىعىن مەڭگەرگەن كاسىپكەر ەكى ديپلومىنا قاراماستان بال شارۋاشىلىعىن دامىتىپ وتىر. ءوزى 10 جىلدان بەرى كاسىپپەن اينالىسادى.
«وتباسىلىق بيزنەستى دامىتۋ ماقساتىندا تاجىريبە الماسىپ ءجۇرمىن. تازا، تابيعي ءونىمنىڭ ساپاسىنا ءوزىمىز جاۋاپ بەرەمىز. ءوز قولىمىزبەن تۇتىنۋشىلارعا جەتكىزەمىز. تۇتىنۋشىلارىمىزدى ىزدەپ، جارناما جاساعان ەمەسپىز. ءبىر- بىرىنەن ەستىپ، كەلىپ جاتىر. الداعى ۋاقىتتا ارانىڭ ازىعىن قولعا العىمىز كەلەدى. ءقازىر وسىمدىك شارۋاشىلىعىمەن اينالىساتىن شارۋالارمەن بىرگە ءجۇرمىز. سولار ەككەن جەردى توزاڭداندىرامىز» ، - دەدى كاسىپكەر نادەجدا ۋسوۆا. ول بالاباقشا مەن مەكتەپتە بالدى مازىرگە كىرگىزۋ بالا دەنساۋلىعىنا قورعاۋعا سەپتىگىن تيگىزەدى دەپ ەسەپتەيدى.
«جاسىل ەكونوميكانى قولداۋ» جانە «G- Global دامىتۋ كواليتسياسى» ز ت ب باسقارما ءتورايىمى سالتانات راقىمبەكوۆانىڭ ايتۋىنشا، 7-8 - قاراشادا نۇر- سۇلتاندا وتەتىن قازاقستاننىڭ اۋىل ايەلدەرىنىڭ ەكىنشى فورۋمىندا «اۋىل ايەلدەرى جەتىستىگىنىڭ 100 تاريحى» كىتابىن تانىستىرىلادى.