توقايەۆ ەلوردانىڭ بارلىق اۋدانىندا ينجەنەرلىك- كوممۋنيكاتسيالىق ينفراقۇرىلىمدى دامىتۋدى تاپسىردى

نۇر- سۇلتان. قازاقپارات - نۇر- سۇلتان ءتورت قۇبىلاسى ساي قالا قاعيداتى بويىنشا دامۋى ءتيىس. بۇل تۋرالى نۇر- سۇلتان قالاسىنىڭ اكىمدىگىندە وتكەن ەلوردانى ودان ارى دامىتۋ ماسەلەلەرى جونىندەگى ماجىلىستە مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.

«ەلوردا ءومىر سۇرۋگە بارىنشا قولايلى قالا بولۋى كەرەك. نۇر- سۇلتان ءتورت قۇبىلاسى ساي قالا قاعيداتى بويىنشا دامۋى ءتيىس. قالا ۇلعايعان سايىن تۇرعىنداردىڭ تۇرمىس ساپاسىنداعى الشاقتىق تا ارتادى. ءتىپتى، جولى جانە كوممۋنيكاتسياسى جوق، اباتتاندىرىلماعان جەر تەلىمدەرى ورتالىق كوشەلەرگە ىرگەلەس ورنالاسقان. ميچۋرينو، ينتەرناتسيونالنىي، كۇيگەنجار تۇرعىن الاپتارىندا سۋمەن قامتاماسىز ەتۋ، كارىز جەلىلەرى ءالى كۇنگە دەيىن ورتالىق جۇيەگە قوسىلماعان. بۇعان جەرگىلىكتى تۇرعىندار نارازىلىق بىلدىرۋدە» ، - دەدى مەملەكەت باسشىسى.

ق ر پرەزيدەنتىنىڭ اتاپ وتۋىنشە، قالا شەتىندەگى جولداردىڭ 36 پايىزى ناشار، اسفالت توسەلمەگەن. سوندىقتان كۇردەلى جوندەۋ جۇمىستارىن جۇرگىزۋ قاجەت. كوشەلەردىڭ 20 پايىزدان استامىندا جارىق جوق. مۇنداي كەلەڭسىزدىك قىلمىستىڭ ارتۋىنا اكەلەدى.

«ۇكىمەت پەن اكىمدىككە قالانىڭ بارلىق اۋداندارىندا ينجەنەرلىك- كوممۋنيكاتسيالىق ينفراقۇرىلىمدى دامىتۋ ءۇشىن ءتيىستى شارالار قابىلداۋدى تاپسىرامىن» ، - دەدى ق. توقايەۆ.