توقايەۆ ەلوردادا جاياۋ جۇرگىنشىلەر ءۇشىن وتپە جولداردى ارتتىرۋدى جۇكتەدى
بۇل تۋرالى نۇر- سۇلتان اكىمدىگىندە وتكەن قالانى ودان ارى دامىتۋ ماسەلەلەرى جونىندەگى ماجىلىستە مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«ەلوردا تۇرعىندارىنىڭ تورتتەن ءبىرى قوعامدىق كولىكتىڭ باعدار كەستەسىنە كوڭىلدەرى تولمايتىندىعىن بىلدىرەدى. سەبەبى، كوپتەگەن بۇرالاڭ باعدارلار جولعا كەتەتىن ۋاقىتتى ۇزارتىپ جىبەرەدى. سونىمەن قاتار ەلوردالىقتار سالونداردىڭ تارلىعى مەن لىق تولى بولاتىندىعىن اتاپ وتەدى. اۆتوبۋس باعدارلارىنىڭ جۇكتەمەسى مەن سۇرانىسىنا ساراپتاما جاساۋ، جۇكتەمەسى ەڭ كوبىن انىقتاۋ جانە اسىرەسە قاۋىرت ۋاقىتتا ولاردى قوسىمشا اۆتوبۋستارمەن كۇشەيتۋ قاجەت» ، - دەدى ق ر پرەزيدەنتى.
مەملەكەت باسشىسى جاياۋ جۇرگىنشىلەر ينفراقۇرىلىمىن دامىتۋ ماسەلەسىنە دە ايىرىقشا نازار اۋداردى.
«قالانىڭ كوپتەگەن اۋدانىندا اباتتاندىرىلعان جاياۋ جۇرگىنشىلەر جولاعى مەن وتپەسى جوق. بۇل، جاياۋ جۇرگىنشىلەردىڭ ءومىرى مەن دەنساۋلىقتارىنا قاتەر تۋدىرادى. شىندىعىندا ماشينالار ءجۇرىپ جاتادى جانە ادامدار كوشەنى قيىپ وتە المايدى. جولدان جۇگىرىپ ءوتىپ، جول قوزعالىسى ەرەجەسىن بۇزۋعا ءماجبۇر بولادى. سول ارقىلى وزىنە دە، جۇرگىزۋشىگە دە تاۋەكەل تۋدىرادى. بارلىق وركەنيەتتى قالالاردا جاياۋ جۇرگىنشىلەرگە ارنالعان وتپەلەر بار. سىزدەر جۇرگىزۋشىلەر ءۇشىن جاعداي جاساپ، قالا تۇرعىندارىنىڭ قاجەتتىگىنە قامقورلىق تانىتپاي وتىرسىزدار. مىنە، سوندىقتان ولار جولدان جۇگىرىپ وتەدى. سىزدەر وسىنداي دۇرىس جوبالارمەن اينالىسىپ، كوپىرلەر، وتپەلەر سالىڭىزدار. جاھاندانۋمەن اۋەستەنۋدىڭ قاجەتى جوق» ، - دەدى ق. توقايەۆ.