قاسىم-جومارت توقايەۆ ەلوردانىڭ ارحيتەكتۋرالىق كەلبەتىن سىنادى

نۇر-سۇلتان. قازاقپارات - نۇر-سۇلتان اكىمدىگىندە وتكەن ەلوردانى ودان ارى دامىتۋ ماسەلەلەرى جونىندەگى ماجىلىستە مەملەكەت باسشىسى قاسىم-جومارت توقايەۆ قالانىڭ سىرتقى كەلبەتىنە قاتىستى سىن ايتتى، دەپ حابارلايدى قازاقپارات ءتىلشىسى.

«ەلوردادا قالا قۇرىلىسىنىڭ ءبىرىڭعاي ساياساتى جوق. بۇل، ءبىرقاتار اۋداندا رەتسىز، بەيبەرەكەت قۇرىلىستارعا الىپ كەلەدى. كوشەلەر مەن عيماراتتاردى راسىمدەۋدىڭ ءبىرىڭعاي ۇيلەسىمدى ستيلى جوق. سىزدەر ەلوردانى كورۋ ءۇشىن ارنايى كەلگەن تۋريستەردىڭ پىكىرلەرىن ەستىگەن دە شىعارسىزدار. تولىقتاي العاندا، ولار ارينە، وڭ پىكىرلەر. ءبىراق، قالادا ەكلەكتيكانىڭ دا جوقتىعىن اتاپ وتەدى»، - دەدى ق ر پرەزيدەنتى.

مەملەكەت باسشىسىنىڭ پايىمىنشا، مۇنداي نىسانداردا جايلىلىق بولمايدى.

«ءبىر عيمارات ءبىر ستيلدە، ەكىنشىسى باسقا ستيلدە سالىنعان. ەڭ باستىسى، جايلىلىق جوق. پليتالارى ۇشىپ، اسفالت جارىلىپ جاتىر. جاسىل وسكىن از. جالپى، قالانى قاداعالاپ، كۇتىپ ۇستامايتىنداي سەزىم قالىپتاسادى. قوجايىنى جوق»، - دەدى ق. توقايەۆ.

پرەزيدەنت بۇل ماسەلەنى ەلباسى نۇرسۇلتان نازاربايەۆ تا بىرنەشە مارتە ايتقانىن ەسكە سالدى.

«الىستان ساۋلەتتى عيمارات جامان كورىنبەيدى. ال جاقىن كەلىپ قاراساڭ، «شارشاپ» قالعانى كورىنىپ تۇرادى. قوجايىن كەرەك. ەڭ الدىمەن، اۋدان اكىمدەرى قوجايىن بولۋى ءتيىس. ولار كابينەتتە وتىرماي جاياۋ ءجۇرىپ، تۇرعىندارىن، ءاربىر عيماراتتىڭ تىنىس- تىرشىلىگىن، بەلگىلى ءبىر عيماراتتا تۇرىپ جاتقان ادامداردىڭ ءومىرىن ءبىلۋى قاجەت. كابينەتتە كەشكى ساعات 6-7 دەن كەيىن قاجەتتى قۇجاتتارعا قول قويۋ ءۇشىن وتىرۋعا بولادى. كەش بولماي تۇرعاندا قالا كوشەلەرى مەن عيماراتتارىن راسىمدەۋدىڭ ءبىرىڭعاي ديزاين-كودىن ازىرلەۋدى تاپسىرامىن. بۇل مەنىڭ اكىمدىككە قاتاڭ تاپسىرمام»، - دەدى مەملەكەت باسشىسى.

اۆتور: مارلان جيەمباي