فولكلورلىق انسامبل ديماش شىرقاعان ءاندى ۇلتتىق اسپاپتا ورىندادى

اقتوبە. قازاقپارات - ديماش قۇدايبەرگەننىڭ ورىنداۋىنداعى «ليۋبوۆ ۋستاۆشيح لەبەدەي» ءانى ۇلتتىق اسپاپتىڭ سۇيەمەلدەۋىمەن كورەرمەنگە ۇسىنىلدى، دەپ حابارلايدى قازاقپارات ءتىلشىسى.

عازيزا جۇبانوۆا اتىنداعى وبلىستىق فيلارمونيانىڭ 75 جىلدىعىنا وراي «دوستىق سازى» فولكلورلىق انسامبلى كونسەرت بەردى.

«ماڭگىلىك ەلدىڭ مۇراسى» كونسەرتى كەزىندە يگور كرۋتويدىڭ «ليۋبوۆ ۋستاۆشيح لەبەدەي» ءانى ۇلتتىق اسپاپتىڭ سۇيەمەلدەۋىمەن كورەرمەنگە ۇسىنىلدى.

انسامبلدىڭ كوركەمدىك جەتەكشىسى باقىتبەك زەينەلوۆتىڭ جاڭا تۋىندىسىنا ءانشى ديماش قۇدايبەرگەن دە ريزاشىلىعىن ءبىلدىردى.

«اكەممەن بىرگە وسكەن جان دوسى، 1998 -جىلدان بەرى «ديماش ءالي» شىعارماشىلىق ورتالىعىنىڭ كوركەمدىك جەتەكشىسى بولىپ، اتا-انامنىڭ تالاي اندەرىنىڭ جانە مەنىڭ ورىنداۋىمداعى «دايديداۋ» ءانىمنىڭ ارانجيروۆكاسىن جاساعان باقىتبەك اعا رەپەرتۋارىمداعى «ليۋبوۆ ۋستاۆشيح لەبەدەي» دەپ اتالاتىن ءانىمدى قازاق ۇلتتىق اسپاپتارىنا وڭدەپ شىعارعان. ماعان جانە ءاننىڭ اۆتورى يگور كرۋتوي اعامىزعا قاتتى ۇنادى»، - دەپ جازدى ديماش قۇدايبەرگەن ءوزىنىڭ الەۋمەتتىك پاراقشاسىنا.

تانىمال ءان اۋەنىنىڭ وڭدەلۋى كومپوزيتور يگور كرۋتويعا دا ۇناعان. ول جاڭا نۇسقانىڭ ەرەكشە تارتىمدى ەكەنىن جازعان.

اۆتور: التىناي ساعىندىقوۆا