الماتىدا قازاقتان شىققان تۇڭعىش وليمپيادا چەمپيونىنىڭ مەرەيتويى اتالىپ ءوتتى

الماتى. قازاقپارات - الماتىدا قازاقتان شىققان تۇڭعىش وليمپيادا چەمپيونى ءالجان جارمۇحامەدوۆتىڭ 75 جاسقا تولعان مەرەيتويى اتالىپ ءوتتى، دەپ حابرلايدى قازاقپارات ءتىلشىسى.

سالتاناتتى كەشكە، باسكەتبولدان ميۋنحەن وليمپياداسىنىڭ جەڭىمپازى ءالجان جارمۇحامەدوۆ بۇگىنگى كۇنى تۇرىپ جاتقان ماسكەۋ قالاسىنان ارنايى ۇشىپ كەلدى. شاراعا ق ر ۇلتتىق وليمپيادالىق كوميتەتى سپورت ديرەكسياسىنىڭ باسشىسى ەلسيار قاناعاتوۆ، الماتى قالاسى دەنە شىنىقتىرۋ جانە سپورت باسقارماسىنىڭ باسشىسى رۇستەم بايسەيىتوۆ جانە ءبىرقاتار تانىمال سپورتشىلار قاتىستى.

ءالجان جارمۇحامەدوۆكە ۇلتتىق وليمپيادالىق كوميتەتىنىڭ پرەزيدەنتى تيمۋر قۇلىبايەۆ پەن الماتى قالاسى اكىمى باقىتجان ساعىنتايەۆتىڭ قۇتتىقتاۋ حاتتارى وقىلىپ، داڭقتى ارداگەر سپورتشىعا قازاقتىڭ داستۇرىمەن شاپان جابىلدى. ال بەلگىلى مەسەنات دۋلات تاستەكەيەۆ چەمپيونعا «Assyltas» قوعامدىق قورىنىڭ توسبەلگىسىن جانە ارنايى سىياقىنى تابىستادى.

كەش ۇيىمداستىرۋشىسى - «Assyltas» قوعامدىق قورى.

ايتا كەتەيىك، ءالجان جارمۇحامەدوۆ 1972 -جىلى باسكەتبولدان ك س ر و قۇراماسى ساپىندا وليمپيادا جەڭىمپازى اتانعان.

ءالجان جارمۇحامەدوۆ 1944 -جىلى 2 -قازاندا وڭتۇستىك قازاقستان وبلىسى، بوستاندىق اۋدانىندا، تاباقساي اۋىلىندا دۇنيەگە كەلگەن.

اۆتور: الما مۇقانوۆا