قازاقستان قاي ەلدەردە ساۋدا وكىلدىگىن اشادى
بۇل جايىندا ءماجىلىس دەپۋتاتتارىنىڭ رەسمي ساۋالىنا ق ر پرەمەر-ءمينيسترى اسقار ماميننىڭ جاۋابىندا ايتىلعان، دەپ حابارلايدى قازاقپارات ءتىلشىسى.
ۇكىمەت باسشىسىنىڭ اتاپ وتۋىنشە، حالىقارالىق تاجىريبە كورسەتىپ وتىرعانداي، سىرتقى نارىقتاردا ساۋدا وكىلدىكتەرىن اشۋ ەڭ الدىمەن شەتەلدەگى قازاقستاننىڭ ەكونوميكالىق مۇددەلەرىن ىلگەرىلەتۋگە مۇمكىندىك بەرەدى.
ەكىنشىدەن، قازاقستاندىق بيزنەستىڭ تاۋارىن جەتكىزگەن ەلدەگى مۇددەسىن قورعايدى جانە سول ەلدە تۇراقتى بولۋىن قامتاماسىز ەتەدى.
ۇشىنشىدەن، جەرگىلىكتى دەڭگەيدە وتاندىق شيكىزاتتىق ەمەس (وڭدەلمەگەن) تاۋارلار مەن قىزمەتتەردىڭ يميدجىن كوتەرۋ ماقساتىندا كورمەلەر، جارنامالىق تانىستىرىلىم شارالارىن، سەمينارلار وتكىزۋگە جاردەم بەرەدى.
تورتىنشىدەن، ورنالاسقان مەملەكەتتىڭ ساۋدا ساياساتى شارالارىن جيناۋعا جانە ساراپتاۋعا، قازاقستاندىق تاۋارلار مەن قىزمەتتەر ەكسپورتىن كەڭەيتۋ ءارى ءارتاراپتاندىرۋ بويىنشا ۇسىنىستار ازىرلەۋگە، تاۋارلار مەن قىزمەتتەردىڭ الەۋەتتى سۇرانىسىن زەردەلەۋگە مۇمكىندىك بولادى.
«وسىعان وراي ۇلتتىق ەكسپورتتىق ستراتەگياعا سايكەس 2019 -جىلدان قازاقستاننىڭ 10 ساۋدا وكىلدىگىن اشۋ جوسپارلانعان: رەسەي (قازان، ماسكەۋ، ەكاتەرينبۋرگ)، وزبەكستان رەسپۋبليكاسى (تاشكەنت)، قىتاي حالىق رەسپۋبليكاسى(ۇرىمجى، بەيجىڭ)، بىرىككەن اراب امىرلىكتەرى (راس- ەل- حايما)، قىرعىز رەسپۋبليكاسى (بىشكەك)، ازەربايجان رەسپۋبليكاسى (باكۋ)، بەلارۋس رەسپۋبليكاسى (مينسك)» - دەپ اتاپ وتەدى اسقار مامين.
اۆتور: مارلان جيەمباي