نۇر-سۇلتان مۇسىلمان الەمىنىڭ «جاسىل» قالاسى اتاندى

نۇر-سۇلتان. قازاقپارات - نۇر-سۇلتان قالاسى ءبىرىنشى بولىپ يسلام الەمىنىڭ «جاسىل» استاناسى اتاندى، دەپ حابارلايدى قازاقپارات س ءى م سىلتەمە جاساپ.

قازاقستاننىڭ مىسىرداعى ەلشىسى ارمان يساعاليەۆ باستاعان دەلەگاتسيا ماروككونىڭ استاناسى رابات قالاسىندا ورنالاسقان ءبىلىم، عىلىم جانە مادەنيەت جونىندەگى يسلام ۇيىمىنىڭ (يسەسكو) شتاب-پاتەرىندە وتكەن ەكولوگيا مينيسترلەرىنىڭ 8- يسلام كونفەرەنتسياسىنا قاتىستى.

ماروككو كورولى مۇحاممەد VI قولداۋىمەن وتكەن بۇل فورۋمنىڭ باستى تاقىرىبى «قورشاعان ورتانى قورعاۋ مەن تۇراقتى دامۋداعى مادەني جانە ءدىني فاكتورلاردىڭ ءرولى» بولدى.

كونفەرەنتسياعا 36 مەملەكەت پەن 11 حالىقارالىق ۇيىمنىڭ دەلەگاتسيالارى قاتىستى. ءىس-شارا بارىسىندا قاتىسۋشىلار مۇسىلمان الەمىنىڭ قورشاعان ورتاسى، دۇنيەجۇزىلىك جىلۋ كوتەرىلۋ ۇدەرىسى، اۋا مەن سۋ كوزدەرىنىڭ لاستانۋى پروبلەمالارىن تالقىلاپ، يسلام ەلدەرىنىڭ ەكولوگيانى ساقتاۋ جولىنداعى ساياساتىن دامىتۋ جولدارىن بەلگىلەدى. تالقىلاۋ ناتيجەسىندە ستراتەگيالىق ءمانى بار قۇجاتتار قابىلداندى.

سونىمەن قاتار، فورۋم اياسىندا يسلام مەملەكەتتەرىنىڭ قورشاعان ورتانى قورعاۋعا قوسقان ەرەكشە ۇلەسى ءۇشىن ارنايى ماراپاتتار تاپسىرىلدى.

يسەسكو كوميسسياسى نۇر-سۇلتان قالاسى اكىمدىگىنىڭ بۇل سالاداعى جۇمىسىنا جوعارى باعا بەرىپ، سايىستىق نەگىزدە قازاقستان استاناسىنا «مۇسىلمان الەمىنىڭ ەڭ جاسىل قالاسى» نوميناتسياسىندا ارنايى سىي بەردى.

2017-جىلى يسەسكو ساۋد ارابياسى كورولدىگىمەن بىرلەسە وتىرىپ، قوعامنىڭ بارلىق سەگمەنتتەرىندە قورشاعان ورتانى قورعاۋ جاۋاپكەرشىلىگىن ناسيحاتتاۋ، قالالاردى ەكولوگيالىق تازالىققا، جاڭا ەنەرگيا كوزدەرىن قولدانۋعا ۇگىتتەۋ، سونداي-اق ءبىلىم، عىلىم، مادەنيەت، ونەر جانە مەديا سالالارىنان ناقتى جانە ورنىقتى باستامالاردى قولداۋ ماقساتىندا اراب، افريكا جانە ازيا ايماقتارىنان ءۇش يسلام استاناسى جۇلدەسىن جاريالاعان بولاتىن.

بيىل نۇر-سۇلتان قالاسى تۇڭعىش جۇلدەنى ازيا ەلدەرى توبىنان الىپ وتىر. يسەسكو باسشىلىعى 2017-جىلى «بولاشاق ەنەرگياسى» ۇرانىمەن «ەكسپو» حالىقارالىق مامانداندىرىلعان كورمەسىن وتكىزگەن، جالپى تازالىق، قورشاعان ورتانى قورعاۋ، جاڭا ەنەرگياسى كوزدەرى جوبالارىن ىسكە اسىرۋ بويىنشا قارقىندى دامۋ باعىتىنا تۇسكەن نۇر-سۇلتان قالاسى ءبىرىنشى بولىپ يسلام الەمىنىڭ «جاسىل» استاناسى بولىپ جاريالانۋى زاڭدىلىق ەكەنىن تىلگە تيەك ەتتى.

ادەتتەگىدەي، بۇل جۇلدەنى العان قالادا قورشاعان ورتانى قورعاۋ سالاسى بويىنشا ورنىقتى دامۋ، عىلىمي زەرتتەۋ جوبالارى، ەكولوگيالىق تاقىرىپتاردا حالىقارالىق كونفەرەنتسيالار، كورمەلەر جانە ت. ب. ءتۇرلى ءىس-شارالار قارقىندى ۇيىمداستىرىلادى.