داريعا نازاربايەۆا: بيۋجەت باسىمدىقتارى ناقتى بولماسا ناتيجە بولمايدى

نۇر-سۇلتان. قازاقپارات - سەناتتا داريعا نازاربايەۆانىڭ ءتوراعالىق ەتۋىمەن بيۋدجەت زاڭناماسىن جەتىلدىرۋ جونىندەگى كەڭەستىڭ وتىرىسى ءوتتى، دەپ حابارلايدى قازاقپارات پالاتانىڭ باسپا ءسوز قىزمەتىنە سىلتەمە جاساپ.

سەنات ءتوراعاسى كەڭەس ءوز قىزمەتىن تاياۋدا - 2019-جىلدىڭ ساۋىرىندە باستاعانىن ەسكە سالدى. «وسى ۋاقىت ىشىندە اۋقىمدى جۇمىستار اتقارىلدى. اسىرەسە، قازىرگى الەۋمەتتىك جانە ەكونوميكالىق جۇيەلەرى الدىنداعى تاۋەكەلدەر مەن قاتەرلەر اياسىندا ونى جالعاستىرۋ وتە ماڭىزدى دەپ ەسەپتەيمىز»، - دەدى ول.

سەناتورلار الدىندا ۇلتتىق ەكونوميكا ءمينيسترى رۋسلان دالەنوۆ بايانداما جاسادى. بيۋجەت ۇدەرىسىن رەفورمالاۋ جونىندەگى جول كارتاسىن ۇسىنعان كەزدە ول بيۋدجەتتىك باعدارلامالاردى ىسكە اسىرۋدىڭ تيىمدىلىگىن باعالاۋدى جاقسى جانە نەعۇرلىم جەدەل جۇرگىزۋگە مۇمكىندىك بەرەتىن ستراتەگيالىق جوسپاردىڭ جاڭا تۇرپاتى تۋرالى ايتتى. ر. دالەنوۆ سونداي-اق بارلىق مەملەكەتتىك قۇرىلىمدارعا ارنالعان جاڭا سيپاتتاعى جوسپار بيىلعى جىلدىڭ سوڭىنا دەيىن بەكىتىلەتىنىن جەتكىزدى.

«2020-جىلدىڭ مامىر ايىندا 2021-جىلدان 2023-جىلعا دەيىنگى ءۇش جىلدىق كەزەڭگە بيۋجەتتى قالىپتاستىرۋ كەزىندە مەملەكەتتىك ورگاندار ستراتەگيالىق جوسپاردى جاڭا تۇردە ۇسىناتىن بولادى»، - دەپ اتاپ ءوتتى مينيستر.

د. نازاربايەۆانىڭ پىكىرىنشە، مەكەمەلەر تەك ءوز بيۋجەتتەرىنىڭ جوبالارىن ازىرلەي باستاعان ساتتەن باستاپ رەسپۋبليكالىق بيۋجەتتىڭ اتقارىلۋىن باقىلاۋ جونىندەگى ەسەپ كوميتەتىمەن ءوزارا تىعىز جۇمىس ىستەۋى ءتيىس. «بۇل جوسپارلانعان شىعىستاردى سالۋدىڭ ورىندىلىعىن ۋاقتىلى باعالاۋ تۇرعىسىنان وتە ماڭىزدى»، - دەدى سەنات باسشىسى.

وتىرىس بارىسىندا نىسانالى كورسەتكىشتەردى وڭتايلاندىرۋ، ءتۇرلى مەملەكەتتىك باعدارلامالاردى قارجىلاندىرۋ جانە باسقارۋ تۋرالى ۇسىنىستار ايتىلدى. سەناتور ءالي بەكتايەۆتىڭ ايتۋىنشا، ولاردىڭ كەيبىرىنە ءارتۇرلى ارنالار ارقىلى قارجى بولىنەتىنى، الايدا، ەشقانداي ناتيجە بەرمەيتىنى بايقالىپ وتىر.

«مەن اگروونەركاسىپ كەشەنى سالاسىندا ءبىر باعدارلاما بويىنشا جۇمىس ىستەيتىن قور بار ەكەنىن، ەكىنشى باعدارلاما بويىنشا جۇمىس ىستەيتىن باسقا قۇرىلىم بار ەكەنىن بىلەمىن. «سىباعا»، «تۇياق» سياقتى باعدارلامالارعا ءار ءتۇرلى كوزدەردەن قاراجات بولىنەدى. ناتيجەسىندە ءبىز ولارعا قانشا بولىنەتىنىن جانە قالاي جۇزەگە اسىپ جاتقانىنان بەيحابارمىز»، - دەدى ءا. بەكتايەۆ.

سەنات ءتوراعاسى داريعا نازاربايەۆا قارجىعا اسا مۇقيات بولۋدى جانە بيۋجەت باسىمدىقتارىن ناقتى بەلگىلەيتىن ۋاقىت كەلگەنىن ايتا كەلىپ: «قازىر ءبىز قارجىلاندىرىپ، بارىنە قولداۋ ءبىلدىرىپ، جان-جاقتى قامتىپ كەلەمىز. سونىڭ ناتيجەسىندە بارىنە تەك تيىن-تەبەن عانا ءتيىپ وتىر. ودان قانداي ناتيجە شىعادى؟»، - دەدى.