ق ر س ءى م شەتەلگە جۇمىسقا جىبەرەتىن كومپانيالاردان ساق بولۋعا شاقىردى

نۇر- سۇلتان. قازاقپارات - قازاقستاندا ەل ازاماتتارىن شەتەلگە جۇمىسقا زاڭسىز جىبەرۋمەن اينالىساتىن ءبىرقاتار كومپانيا مەن جەكە تۇلعالار جۇمىس ىستەيدى.

 بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.

«وزدەرىڭىز بىلەتىندەي، 2019 -جىلدىڭ 25 - قىركۇيەگىندە نورۆەگيانىڭ كوشى- قون بيلىكتەرىمەن جوسپارلى تەكسەرۋ بارىسىندا نورۆەگياعا ماۋسىمدىق جۇمىس ءۇشىن كەلگەن قازاقستاننىڭ 59 ازاماتىنىڭ ميگراتسيالىق ەرەجەنى بۇزعانى انىقتالدى. ولاردىڭ كوپشىلىگى نورۆەگياعا تۋريستىك ۆيزامەن كەلگەن. بۇگىنگى تاڭدا 59 ازاماتتىڭ 45 ءى قازاقستانعا ورالدى. ال قالعان 14 ءى بۇگىن ۇشادى دەپ جوسپارلانۋدا» ، - دەدى ايبەك سمادياروۆ تىلشىلەرگە ارنالعان بريفينگ بارىسىندا.

ونىڭ ايتۋىنشا، قازاقستاننىڭ نورۆەگياداعى ەلشىلىگى مەملەكەت اتىنان وسى جاعدايعا تاپ بولعان ازاماتتارعا تولىق قولداۋ كورسەتكەن.

«ديپلوماتتار ءبىزدىڭ ازاماتتارىمىزدىڭ جانىندا ۇنەمى بولىپ، ولاردىڭ ىقپال ەتۋىنىڭ ارقاسىندا بۇل ماسەلە نورۆەگيالىق بيلىكپەن جەدەل شەشىلدى. تەكسەرۋ قورىتىندىسى بويىنشا، نورۆەگيالىق تاراپ بارلىق ۇستالعاندارعا اۆيابيلەت ساتىپ الۋ جانە ولاردى وتانىنا جونەلتۋ جونىندە شەشىم قابىلدادى. ۇستالعان تۇلعالار وزدەرىنىڭ ىستەرىنە بايلانىستى ماسەلەنى جەدەل شەشكەنى ءۇشىن قازاقستاننىڭ نورۆەگياداعى ەلشىلىگىنە العىسىن ءبىلدىردى» ، - دەدى ول.

رەسمي وكىل اتاپ وتكەندەي، زاڭسىز ەڭبەك كوشى- قونى وزەكتى ماسەلەلەردىڭ ءبىرى.

«ءبىزدىڭ ەلىمىزدە ازاماتتاردى شەتەلگە جۇمىسقا زاڭسىز جىبەرۋمەن اينالىساتىن ءبىرقاتار كومپانيا مەن جەكە تۇلعالار جۇمىس ىستەيدى. وسىعان بايلانىستى ماۋسىمدىق جۇمىسقا رۇقسات راسىمدەۋ جونىندەگى نورۆەگيالىق ەرەجەلەر وتە قاتاڭ ەكەنىن تاعى دا ەسكە سالامىز. نورۆەگياعا قازاقستانداعى باسقا ەۋروپالىق مەملەكەتتەردىڭ ەلشىلىكتەرى ارقىلى راسىمدەلگەن شەنگەن ۆيزاسىمەن ۇشىپ كەلۋگە جانە وسى ەلدىڭ اۋماعىندا ماۋسىمدىق جۇمىسشى رەتىندە قۇجاتتاردى تاپسىرۋعا جول بەرىلمەيدى. قازاقستان ازاماتتارى ءۇشىن ءتيىستى رۇقساتتار مەن ۆيزالاردى نورۆەگيانىڭ ماسكەۋدەگى ەلشىلىگى عانا بەرەدى. قاجەتتى ساۋالنامالاردىڭ، نىسانداردىڭ جانە قۇجاتتاردى بەرۋدىڭ بەكىتىلگەن تالاپتارى وسى ديپميسسيانىڭ ۆەب- سايتىندا كورسەتىلگەن. بۇل رەتتە، ماۋسىمدىق كەلىسىمشارت نورۆەگياعا التى ايدان اسپايتىن ۋاقىت جۇمىس ىستەۋگە عانا مۇمكىندىك بەرەتىنىن، ول اياقتالعاننان كەيىن ەلدەن كەتۋدى تالاپ ەتىلەتىنىن ەسكەرتەمىز» ، - دەدى ول.

ق ر س ءى م رەسمي وكىلى قازىرگى ۋاقىتتا ينتەرنەتتە وزدەرىن شەتەلدە جۇمىسقا ورنالاستىرۋ جونىندەگى اگەنتتەر رەتىندە جارنامالايتىن دەلدالداردىڭ كوپ بولۋىنا بايلانىستى بارلىق ازاماتتاردى ساق بولۋعا شاقىردى.