ماڭعىستاۋ وبلىسىنداعى ستۋدەنتتەردىڭ جاتاقحانالارى باقىلاۋعا الىندى

ماڭعىستاۋ وبلىسى. قازاقپارات - ماڭعىستاۋ وبلىسىنداعى ستۋدەنتتەردىڭ جاتاقحانالارى باقىلاۋدا. بۇل تۋرالى وڭىرلىك كوممۋنيكاتسيالار الاڭىندا وتكەن بريفينگتە ايتىلدى، دەپ حابارلايدى قازاقپارات.

ق ر سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتى وبلىس كولەمىندەگى جوعارى، تەحنيكالىق جانە كاسىپتىك ءبىلىم بەرۋ مەكەمەلەرىنىڭ ستۋدەنتتىك جاتاقحانالارىنا ورنالاستىرۋ ءراسىمىنىڭ اشىقتىعىن قامتاماسىز ەتۋ، سونداي- اق ول جەردە بوگدە ادامداردىڭ تۇرۋىن بولدىرماۋ شارالارى بويىنشا ارنايى مونيتورينگتىك توپ مۇشەلەرىنىڭ، بۇقارالىق اقپارات قۇرالدارى مەن «جاس وتان» جاستار قاناتى وكىلدەرىنىڭ قاتىسۋىمەن ستۋدەنتتىك جاتاقحانالارعا مونيتورينگ جۇرگىزدى.

جالپى وبلىس كولەمىندە 7 ستۋدەنتتەر جاتاقحاناسى ورنالاسقان، ونىڭ ۇشەۋى جوعارى وقۋ ورنىنا، ۇشەۋى ارنايى ورتا ءبىلىم بەرەتىن وقۋ ورىندارىنا جانە بىرەۋى جەكە كاسىپكەرگە تيەسىلى.

مونيتورينگ بارىسىندا انىقتالعانى، ح. وزبەكعاليەۆ اتىنداعى ماڭعىستاۋ پوليتەحنيكالىق كوللەدجىنىڭ №5-ستۋدەنتتەر جاتاقحاناسىن ماڭعىستاۋ وبلىسى اكىمىنىڭ ورىنباسارى ر. ك. ساكەيەۆتىڭ 24.04.2019 -جىلعى حاتتاماسى (حاتتاما ءنومىرى كورسەتىلمەگەن) نەگىزىندە ستۋدەنتتەردى باسقا جاتاقحاناعا ورنالاستىرىپ، كۇردەلى جوندەۋ جۇمىستارىن جۇرگىزۋ ءۇشىن جاپقان.

الايدا، ستۋدەنتتەر جاتاقحاناسىن كۇردەلى جوندەۋدەن وتكىزۋ جوبالىق-سمەتالىق قۇجاتتامالارىن دايىنداۋ، قاراجات قاراستىرۋ ماسەلەلەرى بۇگىنگى كۇنگە دەيىن شەشىمىن تاپپاي، جينالىس حاتتاماسىنىڭ تارماقتارى ورىنداۋسىز، قاعاز جۇزىندە عانا قالىپ وتىرعاندىعى بەلگىلى بولدى.

بۇگىنگى كۇندە اتالعان كوللەدج ستۋدەنتتەرى جانە اقتاۋ قالاسىنداعى كوللەدجدەردىڭ 168 ستۋدەنتى «گۋسەينوۆ» جەكە كاسىپكەردىڭ يەلىگىندەگى جاتاقحاناعا 3 ەسە ارتىق تولەممەن قاراجات تولەپ جاتۋدا (8000 تەڭگە).

ش. ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىنىڭ №1، №2، №3 -ستۋدەنتتەر جاتاقحاناسىن باقىلاۋ بارىسىندا №2 -جاتاقحانادا 1 ادامعا 6 شارشى مەتر كولەم تيەسىلى بولسا، مۇندا ستۋدەنتتەر تۇرىپ جاتقان 112 بولمەنىڭ 66 دا بۇل تالاپ ساقتالماي وتىر. ياعني، كولەمى 14 شارشى مەتر بولمەدە 3 ادامنان تۇرىپ جاتقانى انىقتالدى جانە №3 جاتاقحانادا بارلىق ستاندارتتار ساقتالعانىمەن، ۋنيۆەرسيتەت تاراپىنان ۇيىمداستىرىلعان اسحانادا كاسسالىق اپپاراتتار جوق.

ايتا كەتۋ كەرەك، ەسەپتەگىش قۇرالداردىڭ، كاسسالىق اپپاراتتادىڭ بولماۋى سىبايلاس جەمقورلىق تاۋەكەلدەرىنىڭ كورىنىسى بولىپ تابىلادى.

سونىمەن قاتار، قاراقيا اۋدانىندا ورنالاسقان قاراقيا كاسىپتىك كوللەدجىنە قاراستى ستۋدەنتتەر جاتاقحاناسىندا ستاندارتتاردىڭ تولىقتاي ساقتالعاندىعى جانە ستۋدەنت مەملەكەت ەسەبىنەن تەگىن تۇراتىنى، بارلىق جاعدايلارى جاسالعانى بەلگىلى بولدى.

جۇرگىزىلگەن مونيتورينگ بارىسىندا انىقتالعان كەمشىلىكتەر بويىنشا ۇسىنىستار جولداندى، ءتيىستى شارالار قولدانىلاتىن بولادى.