قىتاي پارلامەنتىنىڭ جەتەكشىسى نۇر-سۇلتاندا ينۆەستيتسيانى قورعاۋ ماسەلەسىن كوتەردى

نۇر-سۇلتان. قازاقپارات – قىتاي پارلامەنتىنىڭ سپيكەرى لي چجانشۋ قازاق-قىتاي اراسىنداعى ينۆەستيتسيانى قورعاۋ، كەدەندىك راسىمدەۋ جانە جۇمىس ىستەۋگە رۇقسات بەرۋ، قولايلى ينۆەستيتسياعا مۇمكىندىك جاساۋ كەلىسىمدەرىنىڭ جاڭارعان نۇسقاسىن تەز ارادا راتيفيكاتسيالاۋ كەرەگىن مالىمدەدى.

بۇل تۋرالى 25- قىركۇيەكتە قىتايدىڭ مەملەكەتتىك Xinhua جاڭالىقتار اگەنتتىگى حابارلادى.

Xinhua اگەنتتىگىنىڭ جازۋىنشا، قىتاي حالىقتارى وكىلدەرى جينالىسىنىڭ تۇراقتى كوميتەتىنىڭ جەتەكشىسى لي چجانشۋ بۇل مالىمدەمەسىن قازاقستان سەناتىنىڭ سپيكەرى داريعا نازاربايەۆا مەن ءماجىلىس ءتوراعاسى نۇرلان نىعماتۋللينمەن كەزدەسۋدە ايتقان.

لي چجانشۋ قازاقستانعا رەسمي ساپارمەن 21-25- قىركۇيەكتە كەلگەن ەدى.

اگەنتتىكتىڭ حابارلاۋىنشا، لي چجانشۋ ەكى ەلدىڭ پارلامەنتى «مەملەكەت باسشىلارىنىڭ كەلىسىمىن» بىرلەسە جۇزەگە اسىرۋ كەرەگىن ايتقان. قازاقستان پارلامەنتى پالاتالارىنىڭ سپيكەرلەرى مەن قىتاي پارلامەنتىنىڭ باسشىسى قانداي كەلىسىمگە كەلگەنى جايلى قازاقستاندىق رەسمي باسىلىمدار جازبادى. قازاقستان پارلامەنتىنىڭ رەسمي سايتىندا دا لي چجانشۋدىڭ ايتقانى جايلى اقپارات جوق.

قىتاي پارلامەنتىنىڭ جەتەكشىسى لي چجانشۋ قازاقستان پرەزيدەنتى قاسىم-جومارت توقايەۆپەن كەزدەسۋدە «الەمدە جانە ايماقتا قانداي جاعداي بولماسىن ەكى ەل ءبىر-ءبىرىن قۇرمەتتەپ، سەنىپ جانە قولداۋى كەرەك» دەگەن.

Xinhua اگەنتتىگىنىڭ حابارلاۋىنشا، لي چجانشۋ قازاقستاننىڭ بۇرىنعى پرەزيدەنتى نۇرسۇلتان نازاربايەۆپەن كەزدەسۋدە «ەكى ەل ساياسي قارىم-قاتىناستى جانە ءار سالاداعى سەرىكتەستىكتى كۇشەيتۋ كەرەگىن» ايتقان.

11- قىركۇيەكتە قازاقستان پرەزيدەنتى اكىمشىلىگى «توقايەۆ پەن قىتاي پرەزيدەنتى شي جينپيڭ كەزدەسۋ كەزىندە 10 قۇجاتقا قول قويعانىن» حابارلاعان. ال لي چجانشۋ ايتقان «تەز ارادا راتيفيكاتسيالانۋى ءتيىس قۇجاتتار» جايلى اقوردا سايتىندا جازىلماعان.

«قىتاي مەن قازاقستان ەنەرگەتيكا، اۋىل شارۋاشىلىعى، قارجى، تەحنولوگيا، ءبىلىم بەرۋ، سپورت، مادەنيەت جانە تۋريزم سالاسى بويىنشا قارىم-قاتىناستى كەڭەيتۋى كەرەك» دەگەن لي چجانشۋ توقايەۆپەن كەزدەسۋدە.

Xinhua اگەنتتىگىنىڭ جازۋىنشا، لي چجانشۋ جانە قازاقستان پرەمەر-ءمينيسترى اسقار مامين نۇر-سۇلتانداعى China Construction Bank (قىتاي قۇرىلىس بانكى) فيليالىنا بارعان.

قازاقستان پرەزيدەنتى توقايەۆ 11- قىركۇيەكتە بەيجىڭدە قازاق-قىتاي ىسكەرلىك كەڭەسىنىڭ التىنشى جينالىسىنىڭ اشىلۋىندا «قىتاي قازاقستاننىڭ سىرتقى ساۋداداعى جانە ەكونوميكاداعى ەڭ ءىرى سەرىكتەسىنىڭ بىرىنە اينالدى» دەگەن. بۇدان بولەك، توقايەۆ قىتايعا ءبيداي، ءسۇت جانە ەت ونىمدەرىن ەكسپورتىن ارتتىرۋ جايلى ايتقان.

توقايەۆ بەيجىڭگە قازاقستاندا قىتايعا قارسى نارازىلىق ءوتىپ جاتقان تۇستا بارعان ەدى. ميتينگىگە شىققاندار «قىتايدىڭ قازاقستانداعى جوبالارىنا» قارسى بولعان. نارازىلار بيلىكتەن قىتاي جوبالارىنان باس تارتۋدى، قازاقستان پرەزيدەنتى قاسىم-جومارت توقايەۆتان بەيجىڭگە بارماۋدى تالاپ ەتكەن (توقايەۆ 11-12- قىركۇيەكتە قىتايعا رەسمي ساپارمەن بارىپ، بىرنەشە قۇجاتقا قول قويىپ قايتتى). جاڭاوزەندىكتەر قالانىڭ ورتالىق الاڭىندا نارازىلىقتارىن ءبىر اپتا وتكىزدى. 4- قىركۇيەكتە ولاردى قولداعان اكسيا الماتى، نۇر-سۇلتان، شىمكەنت، اقتوبە، سەمەيدە دە ءوتتى.

رەسمي نۇر-سۇلتان ەلدە «قىتايدىڭ 55 زاۋىت سالىنادى» دەگەن اقپاراتتى «جالعان» دەيدى، ءبىراق بەيجىڭمەن بىرلەسكەن 55 جوبا بارىن، ونىڭ كەيبىرى ىسكە اسىرىلىپ جاتقانىن ايتادى. ۇكىمەت وسى 55 جوبانىڭ ارقاسىندا قازاقستاندا 20 مىڭ جۇمىس ورنى اشىلادى دەپ مالىمدەگەن.

«ازاتتىق»