حابيب نۋرماگومەدوۆتىڭ باپكەرى اتىراۋلىق جاستارمەن كەزدەستى
ەركىن فورماتتاعى كەزدەسۋ جاستار جىلىنا وراي «جاستار سپورت fest» جوباسى اياسىندا ۇيىمداستىرىلدى. كەزدەسۋدە اتىراۋلىق جاس سپورتشىلار ابدۋلماناپ نۋرماگومەدوۆكە سۇراقتار قويىپ، باپكەردىڭ تاجىريبەسىنە نەگىزدەلگەن اقپاراتتارمەن تانىستى. سونداي-اق، كەزدەسۋگە قاتىسۋشىلار حابيب نۋرماگومەدوۆتىڭ جەتىستىك جولى تۋرالى ءبىلدى.
«اتىراۋ قالاسىنا العاش كەلۋىم ەمەس. وسىمەن ەكىنشى رەت كەلىپ وتىرمىن. قازاقستاننىڭ اتىنان شىعىپ جۇرگەن الەمدىك دەڭگەيدەگى سپورتشىلار جەتەرلىك. سوندىقتان جاس بۋىنعا ايتارىم، سالاۋاتتى ءومىر سالتىن ۇستانىڭىزدار»، - دەدى ابدۋلماناپ نۋرماگومەدوۆ.
سونىمەن قاتار، كەزدەسۋدە اتىراۋ وبلىستىق دەنە شىنىقتىرۋ جانە سپورت باسقارماسىنىڭ باسشىسى رينات يبراگيموۆ الدا وتكىزىلەتىن «جاستار سپورت fest» شاراسىنىڭ ماڭىزدىلىعىنا توقتالدى.
«پرەزيدەنتىمىز قاسىم-جومارت كەمەل ۇلى دا بۇقارالىق سپورتتى كەڭ كولەمدە دامىتۋ كەرەگىن ءجيى ايتادى. ويتكەنى، اتالعان سپورتتا ءبىزدىڭ چەمپيونداردىڭ كوپ بولۋى - ەلىمىزدىڭ جەتىستىگى. ال، قازىرگى تاڭدا سپورتشىلار اراسىندا جاستار بەلسەندىلىك تانىتىپ كەلە جاتىر. وزدەرىڭىز بىلەتىندەي، ەلباسىمىز اعىمداعى جىلدى جاستار جىلى دەپ جاريالاعان بولاتىن. وسى ورايدا 4 كۇنگە سوزىلاتىن شارا وتكىزبەكشىمىز. وعان ارنايى قوناق رەتىندە كەلگەن ابدۋلماناپ نۋرماگومەدوۆكە سىزدەردىڭ جانە ءوزىمنىڭ اتىمنان العىسىمدى بىلدىرەمىن»، - دەدى رينات يبراگيموۆ.
ايتا كەتەيىك، 27 -قىركۇيەك كۇنى «جايىق» سپورت كەشەنىندە «Gorilla Fighting Champioship 17» حالىقارالىق تۋرنيرى وتەدى. تۋرنيرگە ارنايى قوناق رەتىندە حابيب نۋرماگومەدوۆ، يسلام ماحاچيەۆ، زۋبايرا تۋحۋگوۆ جانە دامير يسماگۋلوۆ سىندى اتاقتى سپورتشىلار كەلەدى.
اۆتور: اباي ابىلاي ۇلى