ورالباي ابدىكارىموۆ: قانداستاردىڭ قۇجات جۇمىسىن ۋاقتىلى ورىنداماعانداردى جاۋاپقا تارتۋ كەرەك

نۇر-سۇلتان. قازاقپارات - مەملەكەت جانە قوعام قايراتكەرى ورالباي ابدىكارىموۆ «شەتەلدەگى وتانداستاردى مەملەكەتتىك قولداۋ تۋرالى» قازاقستان رەسپۋبليكاسىنىڭ زاڭ جوباسىنا قاتىستى ءوز ۇسىنىسىن ءبىلدىردى، دەپ حابارلايدى قازاقپارات ءتىلشىسى.

«قانداستارعا قاتىستى قۇجات جۇمىستارىن ۋاقتىلى ورىنداماعان مەملەكەتتىك ورگاننىڭ قىزمەتكەرلەرى ءتيىستى جاۋاپكەرشىلىكتى كوتەرۋ كەرەك. ياعني، ناقتى شارا قابىلداماساق، بۇل جاعداي سوزىلا بەرەدى. ءۇش، ءتورت، بەس جىل بويى ازاماتتىق الا الماي جۇرگەن قانداستاردىڭ بارىن بىلەمىز. مىنە، ۋاقىت سوزباۋ ءۇشىن ءتيىستى مىندەتىن دۇرىس اتقارماعان جاۋاپتى قىزمەتكەرلەردى جۇمىستان بوساتۋعا دەيىنگى شارانى اكىمشىلىك قۇقىقبۇزۋشىلىق جونىندەگى كودەكسكە ەنگىزۋ كەرەك. سوندا عانا ماسەلەنى رەتتەۋگە بولادى دەپ ويلايمىن. «شەتەلدەگى وتانداستاردى مەملەكەتتىك قولداۋ تۋرالى» قازاقستان رەسپۋبليكاسىنىڭ زاڭ جوباسىن ازىرلەگەندە وسى ماسەلەگە نازار اۋدارىلسا دەيمىن»، - دەدى ورالباي ابدىكارىموۆ ەلورداداعى «وتانداستار قورى» كوممەرتسيالىق ەمەس اكتسيونەرلىك قوعامى جانىنداعى قوعامدىق كوميسسياسىنىڭ وتىرىسىندا.

ايتا كەتسەك، بۇگىن «وتانداستار قورى» كوممەرتسيالىق ەمەس اكتسيونەرلىك قوعامى جانىنداعى قوعامدىق كوميسسياسى «شەتەلدەگى وتانداستاردى مەملەكەتتىك قولداۋ تۋرالى» قازاقستان رەسپۋبليكاسى زاڭ جوباسىن تالقىلادى. جيىن بارىسىندا «وتانداستار قورى» شەتەلدەگى قانداستارعا قازاق كارتاسىن قازاقستاننىڭ باسقا مەملەكەتتەردەگى ەلشىلىكتەرى ارقىلى بەرۋدى ۇسىندى.