قازاقستانعا بيىل قانداستاردىڭ كوبى وزبەكستاننان كەلگەن
«ەلىمىزدە ەتنيكالىق قازاقتاردى قونىستاندىرۋ تەتىگىن جەتىلدىرۋگە باعىتتالعان ق ر كوشى-قون جانە حالىقتى جۇمىسپەن قامتۋ ماسەلەلەرى بويىنشا زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى زاڭعا قول قويىلعان بولاتىن. اسىرەسە، وسى ساناتتاعى ازاماتتار ءۇشىن ورالمان مارتەبەسىن بەرۋ جانە تولەم جۇكتەمەسىنەن بوساتۋ، بۇرىنعى ازاماتتىقتان شىعۋدى رەسىمدەمەۋ جەڭىلدىكتەرى بەرىلدى. ونىڭ ىشىندە ج و و- لاردا وقيتىن ەتنيكالىق قازاقتار ق ر- دا تۇرۋ مەرزىمىنە قاراماستان ازاماتتىقتى جەڭىلدەتىلگەن تارتىپپەن الۋ قۇقىعىنا يە بولدى. بۇل قىتايدان قازاقستانعا تۇراقتى تۇرۋعا كەلەتىن ەتنيكالىق قازاقتاردىڭ ماسەلەسىن شەشۋگە مۇمكىندىك بەردى»، - دەدى عاني شىمىربايەۆ ەلوردادا «شەتەلدەگى وتانداستاردى مەملەكەتتىك قولداۋ تۋرالى» ق ر زاڭ جوباسىن تالقىلاۋ بارىسىندا.
ونىڭ ايتۋىنشا، جوعارىدا اتالعان جۇمىستاردىڭ ناتيجەسىندە شەتتەگى قانداستاردىڭ كوپ بولىگى كوشىپ، قازاقستان ازاماتتىعىن العان.
«ستاتيستيكاعا سۇيەنسەك، ەلىمىز تاۋەلسىزدىك العان ساتتەن باستاپ، قازاقستان رەسپۋبليكاسىنىڭ ازاماتتىعىن 1 ميلليون 57 مىڭ 537 شەتەلدىك العان. ونىڭ ىشىندە 937 مىڭ 663 ءى - ەتنيكالىق قازاقتار. ال وسى جىلدىڭ ەسەپ بەرۋ كەزەڭىنە توقتالار بولساق، ازاماتتىققا بارلىعى 13034 شەتەلدىك قابىلداندى. ونىڭ 10790 نى - ەتنيكالىق قازاقتار. ولاردىڭ باسىم بولىگى قىتايدان كەلگەن قانداستار (4092). وزبەكستاننان – 6216، قىرعىزستاننان 551 ادام كەلدى»، - دەدى عاني شىمىربايەۆ.