شەتەلدەگى قانداستارعا قازاق كارتاسى ەلشىلىكتەر ارقىلى بەرىلۋى مۇمكىن

نۇر-سۇلتان. قازاقپارات - «وتانداستار قورى» كوممەرتسيالىق ەمەس اكسيونەرلىك قوعامى شەتەلدەگى قانداستارعا قازاق كارتاسى قازاقستاننىڭ باسقا مەملەكەتتەردەگى ەلشىلىكتەرى ارقىلى بەرۋدى ۇسىندى، دەپ حابارلايدى قازاقپارات ءتىلشىسى.

«قازاق كارتاسىنىڭ ۇسىنۋ ءتارتىبى بويىنشا تاعى ءبىر ماسەلەنى ايتا كەتەيىن. مىسالى، ءبىز پولشا مەملەكەتىنىڭ تاجىريبەسىن زەرتتەدىك. ول ەلدىڭ تاجىريبەسى بويىنشا، پولشا مەملەكەتىنىڭ شەتەلدەگى ەلشىلىكتەرى تاريحي وتانىنا ورالعىسى كەلەتىن پولياكتارعا وسىنداي كارتانى بەرۋمەن اينالىسادى. ول كارتا تەگىن بەرىلەدى. وسىعان وراي، زاڭ جوباسى بويىنشا قازاق كارتاسىن بەرۋدى قازاقستان رەسپۋبليكاسىنىڭ شەتەلدەگى مەكەمەلەرى ارقىلى بەرۋدى ۇسىنىپ وتىرمىز»، - دەدى «وتانداستار قورى» ك ە ا ق ۆيتسە-پرەزيدەنتى ماعاۋيا سارباسوۆ ەلوردادا «شەتەلدەگى وتانداستاردى مەملەكەتتىك قولداۋ تۋرالى» ق ر زاڭ جوباسىن تالقىلاۋ بارىسىندا.

ونىڭ ايتۋىنشا، قازاق كارتاسىن الۋدىڭ بۇگىنگى تاڭدا ءبىرشاما شارتتارى ازىرلەنگەن.

«ءبىرىنشى - قازاق ۇلتىنا جاتاتىن نەمەسە قازاق ك س ر- نىڭ، ق ر- نىڭ بۇرىنعى ازاماتتىعىن راستايتىن قۇجاتتىڭ بولۋى. ەكىنشىدەن، قازاق ءتىلىنىڭ بازالىق دەڭگەيىن ءبىلۋ. ءۇشىنشىسى - قازاق مادەنيەتى، سالت-ءداستۇرى مەن ادەت-عۇرپى تۋرالى نەگىزگى بىلىمدەرىن مەڭگەرۋى. مەملەكەتتىك ورگانداردىڭ ۇسىنىسىمەن قازاق كارتاسىنىڭ جارامدىلىعى 10 جىلدان 5 جىلعا قىسقارتىلدى»، - دەدى ماعاۋيا سارباسوۆ.

شەتەلدىك قازاقتاردىڭ قازاقستان اۋماعىندا ەل ازاماتتارىمەن بىردەي قۇقىققا يە بولۋىنا مۇمكىندىك بەرەتىن «قازاق كارتاسى» اتتى قۇجاتتىڭ جوباسى دايىندالىپ جاتقانى بۇعان دەيىن حابارلانعان بولاتىن.

«وتانداستار» قورىنىڭ پرەزيدەنتى نۇرتاي ابىقايەۆتىڭ ايتۋىنشا، «قازاق كارتاسى» دەپ اتالاتىن قۇجات شەتەلدىك قازاقتاردىڭ تاريحي وتانىندا ۋاقىتشا ءومىر ءسۇرىپ، بەيىمدەلۋى ءۇشىن جاسالماق.

«شەتەلدەردەگى قازاقتاردى قولداۋعا باعىتتالعان زاڭ قابىلدانادى. سونىڭ اياسىندا «قازاق كارتاسى» دەگەن قۇجات جاسالۋى مۇمكىن. ول قۇجات سىرتتاعى قازاقتارعا قازاقستاندىقتارمەن بىردەي ءومىر سۇرۋگە مۇمكىندىك تۋعىزادى. ياعني، ءبىلىم الۋ، دارىگەرگە قارالۋ، بيزنەسپەن اينالىسۋ، جۇمىس ىستەۋ سياقتى بارلىق ءومىر اسپەكتىلەرىندە قازاقستان ازاماتتارىمەن بىردەي قۇقىققا يە بولادى. تەك ساياساتپەن اينالىسۋعا بولمايدى. ول ءۇشىن ازاماتتىق الۋى قاجەت. «قازاق كارتاسى» قولىندا بار قازاق وتباسىمەن ءبىزدىڭ ەلدە ەشقانداي ۆيزاسىز ءجۇرىپ-تۇرا الادى»، - دەگەن ەدى نۇرتاي ابىقايەۆ.