بوزىمبايەۆ: ساۋد ارابياسى مۇنايىنىڭ ورنىن قازاقستان تولتىرا المايدى

نۇر-سۇلتان. قازاقپارات – «ساۋد ارابياسىنداعى وقيعاعا بايلانىستى نارىقتا تۋىنداعان مۇناي سۇرانىسىن قازاقستان تولتىرا المايدى».

مۇنى قازاقستاننىڭ ەنەرگەتيكا ءمينيسترى قانات بوزىمبايەۆ بەيسەنبى كۇنى باسپا ءسوز جيىنى كەزىندە ايتتى.

ونىڭ پىكىرىنشە، «قازاقستان ساۋد ارابياسىنداعى جاعدايدى پايدالانادى دەۋ» ەتيكاعا قايشى كەلەدى.

«قازاقستان كۇنىنە نەبارى 1,8 ميلليون باررەل مۇناي وندىرەدى. قانشا تىرىسساق تا، ساۋد ارابياسى مۇنايىنىڭ نارىقتاعى ورنىن تولتىرا المايمىز. ونىڭ ۇستىنە، قازاقستان وپەك الدىنداعى مىندەتتەمەسىن ورىنداۋى ءتيىس، ياعني ماۋسىم اياقتالعانعا دەيىن (2020-جىلدىڭ ناۋرىز ايى - ق. ب) قازىرگى مەجەدەن ارتىق مۇناي وندىرۋگە بولمايدى» دەدى قانات بوزىمبايەۆ.

14- قىركۇيەكتە ساۋد ارابياسىنداعى ءىرى مۇناي كەنىشىنە درونمەن شابۋىل جاسالعان. وسىدان كەيىن الەمدەگى ەڭ ءىرى مۇناي وندىرۋشىلەردىڭ ءبىرى - ساۋد ارابياسىنىڭ مۇناي ءوندىرىسى 5,7 ميلليون باررەلگە كۇرت ازايعان. وسىعان وراي قىركۇيەك ايىنىڭ ورتاسىندا نارىقتا مۇناي باعاسى قىمباتتاپ، سۇرانىس كوبەيگەن.

«ازاتتىق»