قازاقستان پرەزيدەنتى ا ق ش-تىڭ ءىرى بيزنەس وكىلدەرىمەن كەزدەستى
مەملەكەت باسشىسىنىڭ نيۋ-يورككە جاساعان ساپارىنىڭ العاشقى كۇنىنە قۇرىلعان رەسمي باعدارلاماسى امەريكالىق ءىرى كومپانيالاردىڭ باسشىلارى قاتىسقان جيىن وتكىزۋىمەن تۇيىندەلدى.
قاسىم-جومارت توقايەۆ ءوز سوزىندە قازاقستان- امەريكا بيزنەس- قاۋىمداستىعىنىڭ وكىلدەرىن قاۋىمداستىقتىڭ قۇرىلعانىنا 20 جىل تولۋىمەن قۇتتىقتاپ، وسى ءىس- شارانى ۇيىمداستىرعانى ءۇشىن ريزاشىلىعىن ءبىلدىردى.
پرەزيدەنت ءسوز باسىندا ەلباسى نۇرسۇلتان نازاربايەۆتىڭ 2018 -جىلدىڭ قاڭتار ايىنداعى ا ق ش-قا ساپارى اياسىندا جاسالعان قازاقستاندىق- امەريكالىق كەڭەيتىلگەن ستراتەگيالىق ارىپتەستىك تۋرالى بىرلەسكەن مالىمدەمەگە قول قويىلعانىنا توقتالىپ، سول كەزدەن باستاپ ەكى ەل اراسىنداعى ساۋدا- ەكونوميكالىق جانە ينۆەستيسيالىق ىنتىماقتاستىقتىڭ ايتارلىقتاي نىعايا تۇسكەنىن اتاپ ءوتتى.
مەملەكەت باسشىسى ا ق ش قازاقستان ەكونوميكاسىنىڭ ءىرى ينۆەستورلارىنىڭ ءبىرى ەكەنىن دە ايتتى. بۇگىندە ءبىزدىڭ ەلىمىزگە امەريكالىق ينۆەستورلار جالپى كولەمى 45 ميلليارد دوللاردان استام قارجى سالعان. قازاقستاندا 500 دەن اسا امەريكالىق كومپانيا جۇمىس ىستەيدى.
- 2018 -جىلى قازاقستانعا تىكەلەي تارتىلعان امەريكالىق ينۆەستيسيالار كولەمى 5,3 ميلليارد دوللارعا جەتىپ، جاڭا رەكورد ورناتتى. ال ءوزارا ساۋدا كولەمى ەكى ەسەگە ارتىپ، 2018 -جىلى 2,8 ميلليارد دوللاردى قۇرادى، - دەدى قاسىم-جومارت توقايەۆ.
قازاقستاننىڭ ەكونوميكالىق مۇمكىندىكتەرى تۋرالى ايتقان پرەزيدەنت امەريكالىق بيزنەسمەندەردىڭ نازارىن ەل دامۋىنداعى ءۇش ماڭىزدى ماسەلەگە اۋداردى. ولار: قولايلى ينۆەستيسيالىق احۋال، نارىق پەن كوممۋنيكاتسيانى دامىتۋ جانە ادامي كاپيتالدى نىعايتۋ.
مەملەكەت باسشىسى امەريكالىق سەرىكتەستەرگە قازاقستان ۇكىمەتىنىڭ ينۆەستيسيالىق احۋالدى جاقسارتۋ ماقساتىندا زاڭ ۇستەمدىگىن، كەلىسىم- شارتتارعا قول سۇعىلماۋىن جانە زياتكەرلىك مەنشىك قۇقىعىن قورعاۋدى قامتاماسىز ەتۋ باعىتىنداعى جۇمىستاردى جالعاستىرا بەرەتىنىن جەتكىزدى.
ونىڭ ايتۋىنشا، ينۆەستورلارمەن جۇمىس ىستەۋدەگى باستى ماسەلە تۇراقتىلىق پەن اشىقتىقتى ساقتاۋ بولىپ تابىلادى. اڭگىمە بارىسىندا قازاقستاننىڭ ەنەرگەتيكا، اۋىل شارۋاشىلىعى، قارجى جانە ادامي كاپيتال سالالارىنداعى الەۋەتى تۋرالى دا ايتىلدى. سونىمەن قاتار، قاسىم-جومارت توقايەۆ ەلىمىزدىڭ كولىك- لوگيستيكالىق مۇمكىندىكتەرىنە دە جەكە توقتالدى.
- قازاقستان شىعىس پەن باتىستى جالعايتىن ماڭىزدى كولىك حابى بولىپ ەسەپتەلەدى. ترانسكونتينەنتالدىق باعىتتاردىڭ 70 پايىزدان استامى قازاقستان اۋماعى ارقىلى وتەدى، - دەپ اتاپ ءوتتى قازاقستان پرەزيدەنتى.
ءسوز سوڭىندا قاسىم-جومارت توقايەۆ امەريكانىڭ ىسكەر توپ وكىلدەرىنە ەل پرەزيدەنتى رەتىندە قازاقستان مەن ا ق ش اراسىنداعى ەكونوميكالىق ارىپتەستىكتىڭ ارتۋىنا كۇش- جىگەرىن جۇمسايتىنىن ايتتى.
وسى كۇنى مەملەكەت باسشىسى تاعى دا ءبىرقاتار ءىرى حالىقارالىق كومپانيالاردىڭ باسشىلارىمەن كەزدەسۋ وتكىزدى. پرەزيدەنت «Royal Dutch Shell» كومپانياسىنىڭ باس اتقارۋشى ديرەكتورى بەن ۆان باردەنمەن مۇناي-گاز جوبالارىن جۇزەگە اسىرۋ جونىندەگى ىنتىماقتاستىق جايىن تالقىلادى.
مەملەكەت باسشىسى «JPMorgan Chase - Co.» ترانسۇلتتىق كومپانياسى ديرەكتورلار كەڭەسىنىڭ ءتوراعاسى جانە باس اتقارۋشى ديرەكتورى دجەيمي دايمونمەن قارجى ينستيتۋتتارى ارقىلى ءوزارا ءىس- قيمىل ماسەلەسىن قارادى.
«Tyson Fresh Meats» كومپانياسىنىڭ پرەزيدەنتى ستيۆ ستاۋففەرمەن جانە «Valmont Industries» كومپانياسىنىڭ باس اتقارۋشى ديرەكتورى ستيۆ كانيەۆسكيمەن كەزدەسۋىندە اۋىل شارۋاشىلىعى سالاسىنداعى ينۆەستيسيالىق جوبالاردى ىسكە اسىرۋ ماسەلەلەرى قوزعالدى.
«Plug' n Play» كومپانياسىنىڭ باس اتقارۋشى ديرەكتورى سايد اميديمەن، «500 Startups» ستارتاپ- اكسەلەراتورىنىڭ جانە ۆەنچۋرلىك قورىنىڭ ۆيتسە-پرەزيدەنتى، باسقارۋشى سەرىكتەسى بەدي يانگپەن كەزدەسۋ كەزىندە ستارتاپ-جوبالار سالاسىنداعى ىنتىماقتاستىق پەرسپەكتيۆالارى ءسوز بولدى.
سونداي-اق، قازاقستان پرەزيدەنتى «Amazon Web Services» كومپانياسىنىڭ جاھاندىق مەملەكەتتىك ساياسات جونىندەگى ۆيتسە-پرەزيدەنتى مايكل پۋنكپەن ەلەكتروندى ساۋدا سالاسىنداعى ءوزارا ءىس-قيمىل جاعدايىن تالقىلادى.