شاتاسىپ شامعا اتتانعان قىز-كەلىنشەكتەر كىمدەر
د ا ي ش توبىنىڭ قول استىندا الەم بويىنشا 86 ەلدىڭ ادامدارى بولسا، سول ەلدەر ءوز ازاماتتارىنان باس تارتىپ، ءتىپتى كەي مەملەكەتتەر ازاماتتىقتان شىعارىپ تاستاپ جاتقاندا، قازاق ەلىنىڭ «وتانىن تارك ەتۋشىلەردى» ارنايى جوبامەن ەلگە قايتارىپ، باسىنان سيپاپ، باۋىرىنا باسۋىن اركىم ءارقالاي باعالاۋدا. ءوز وتانداستارىمىزدى ايتپاعاندا بۇكىل اراب ەلدەرى قازاقستاندىق بيلىكتىڭ قايىرىمدىلىعىنا قايران قالىپ جاتقانىن دا بىلەمىز.
مەن تىلدەسكەن ءبىر توپ ايەلدىڭ بىرەۋى دۇنگەن، قالعانى قازاق ۇلتىنىڭ وكىلدەرى بولدى. اراسىندا جوعارى بىلىمدىلەرى، ەلىمىزدەگى بەدەلدى ۋنيۆەرسيتەتتەردىڭ تۇلەكتەرى، سونداي-اق ءۇي شارۋاسىنداعى ايەلدەر دە بار.
ەلىمىزدەگى وردالى ۋنيۆەرسيتەتتە ماماندانعان، ءبىراق كەيىنگى ۋاقىتتا ءتورت بالاسىنىڭ تاربيەسىمەن ۇيىندە وتىرعان ورتا جاستاعى كەلىنشەكتىڭ كۇيەۋى قۇزىرلى ورىنداردا قىزمەت ەتكەن. يسلام دىنىنە 2002 -جىلدارى كۇيەۋى ۇيرەتىپ، وتباسىندا دارىن مۋباروۆتىڭ ۋاعىزدارىن تىڭداپ، مۋحامماد ابدۋل- ۋاحابتىڭ كىتاپتارىن وقي باستاعان.
«ءسىز كوپ بالالى وتباسىندا تاربيەلەنىپسىز، ون بالانىڭ ەڭ كەنجەسى ەكەنسىز. سوندا سول ۋاقىتقا دەيىن حالقىمىزدىڭ ءداستۇرلى ۇستانىمى، يمام اعزام ءابۋ حانيفا، حانافي ءمازھابى جايلى ەستىگەنىڭىز بار شىعار؟» دەگەن ساۋالعا جاۋاپ بەرگەن ول يسلام دىنىنەن مۇلدەم بەيحابار بولعانىن ايتقان. تەك كۇيەۋىنىڭ ايتۋىمەن نامازعا جىعىلىپ، 2014 -جىلى ۇيلەرىن ساتىپ، اتا-انا، اعايىن-تۋىسقا ايتپاي، سيرياعا «يسلام حاليفاتىندا» ءومىر سۇرۋگە اتتانعان. الايدا 5 جىل تۇماننىڭ ىشىندە، سوعىستىڭ ورتاسىندا كۇيەۋى مەن جالعىز ۇلىنان ايىرىلىپ، ءۇش قىزىمەن ەلگە جەتكىزىلدى.
«سيرياعا ساپارىڭىز سىزگە نە بەردى؟» دەگەندە كەمسەڭدەپ جىلاي بەردى، كۇيەۋىنە كوزسىز سەنىپ، سوڭىنان بوتالارىن جەتەكتەپ كەتە بارعان شەرلى انانىڭ ىشكى الەمى وكىنىشتەن الاي- دۇلەي بولىپ جاتقانىن اڭعارۋ دا قيىن ەمەس ەدى...
بۇل كەلىنشەك قاقتىعىس ايماعىندا كوپ قيىنشىلىق كوردى. وعان پسيحولوگيالىق تۇرعىدان كومەك قاجەت. قازىر ماماندار بۇل كىسىمەن جان-جاقتى جۇمىستار جۇرگىزىپ جاتىر. وعان دىندەردىڭ رۋحاني جانە مورالدىق كومپونەنتتەرى، ايەلدەردىڭ ءرولى مەن الەۋمەتتىك مارتەبەسى، قازىرگى قوعامداعى انالار، دەسترۋكتيۆتى ءدىني بىرلەستىكتەرگە قارسى تۇرۋ ماسەلەلەرى ءتۇسىندىرىلدى.
ايشا كەڭەسباي
ءدىنتانۋشى- جۋرناليست