اعاشتاعى ەشكىلەر

نۇر-سۇلتان. قازاقپارات – ماروككو - سولتۇستىك افريكادا ەلدەرىنىڭ ءبىرى.

بۇل ەل اعاش بۇتاقتارىنا شىعىپ قورەكتەنەتىن ەشكىلەرىمەن تانىمال. ادەتتە شارۋالار اعاشقا زيان بەرمەسىن دەپ، ەشكىلەردىڭ بۇتاقتارعا شىعۋىنا توسقاۋىل بولادى.

ال مۇندا كەرىسىنشە، شارۋالار ەشكىلەردىڭ اعاش بۇتاقتارىنا شىعىپ، تىكەندى اعاشتىڭ جەمىستەرىن جەۋىنە جاعداي جاسايدى.

ويتكەنى بۇل ەشكىلەر قارىندارىن تويدىرۋمەن قاتار كوسمەتولوگيا سالاسىنىڭ جۇمىسشىسىنداي ءىس اتقارادى. سول ايماقتىڭ ءشول دالالارىندا «ارگان» دەپ اتالاتىن اعاشتار وسەدى. 200 -جىلعا دەيىن ءومىر سۇرەتىن بۇل اعاشتا، جاڭعاق كولەمىندەي كەلەتىن قاتتى سۇيەگى (تاشەگى) بار جەمىس وسەدى.

جەمىستىڭ سۇيەگىن سىندىرۋ وڭاي ەمەس. ەشكىلەر بۇتاقتارعا ورمەلەپ، جاپىراقتارىن جەگەندە وسى جەمىستەردى دە سۇيەگىمەن قوسا جۇتادى ەكەن. اسقازاندا جۇمساراتىن بۇل سۇيەكتەرى ەشكىنىڭ قالدىقتارىمەن بىرگە سىرتقا شىعادى. ال شارۋالار وسى جۇمسارىپ شىققان سۇيەكتەردى جيناپ، ىشىندەگى ءدانىن ەزىپ الەمگە ايگىلى ارگان مايىن الادى. ماروككودان كوپتەگەن ەلگە يمپورتتالاتىن ارگان مايى كوسمەتولوگيادا جانە اسپازدىق ونىمدەردە قولدانىلادى. شامامەن 7 اعاشتىڭ داندەرىنەن 1 ليتر ماي الىنادى.

كوسمەتولوگيادا قولدانىلاتىن ماي الۋ ءۇشىن داندەر سۋىق ەزبەدەن وتەدى، ال اسپازدىق سالادا قولدانىلاتىن ماي الۋ ءۇشىن ەزۋدەن بۇرىن داندەر قۋىرىلادى. قۇرامىنداعى توكوفەرول، ياعني ە دارۋمەنىنىڭ كوپتىگىمەن جۇرەك-قان تامىر جۇيەسىنە پايدالى اسەرىمەن تانىمال. كوسمەتولوگيا سالاسىندا تەرى اۋرۋلارىنا قارسى ەمدە جانە شاش، تەرى كۇتىمىنە پايدالى دەپ بىلىنەدى.