ماقپال جۇمابايدىڭ ماقامدى جىرلارى لوندوندا شىرقالدى
اقىن، كومپوزيتور ءارى ورىنداۋشىنىڭ شەتەلدەگى العاشقى قويىلىمىن تاماشالاۋعا ەكى مەملەكەت اراسىنداعى مادەني ارىپتەستىكتى قولدايتىن ونەر سالاسىنىڭ ماماندارى، جەرگىلىكتى قازاق دياسپوراسىنىڭ وكىلدەرى جانە ستۋدەنتتەر كەلدى.
ماقپالدىڭ شىعارماشىلىعىمەن Youtube ارقىلى تانىسىپ، اسەرلى اۋەندەرىنە عاشىق بولعان BBC تەلەارناسىنىڭ جۋرناليسى روبەرت گرينالدىڭ ايتۋىنشا، ءانشىنىڭ جاندى داۋىستا ورىنداعان اندەرىن لوندوندا تىڭداۋ بريتانيالىق كورەرمەن ءۇشىن وتە كەرەمەت مۇمكىندىك.
ال برايتون ۋنيۆەرسيتەتىنىڭ لەكتورى ماكس تۋكي بولسا، ماقپال جۇمابايدىڭ شىعارماشىلىعى الەمگە ايگىلى ءانشى بورك پەن پورتيسحەد توبىن ەسكە سالادى دەگەن پىكىردە. «ءبىراق، مەنىڭشە، ول دارا تۇلعا. ماعان ماقپالدى باسقا ارتىستەرمەن سالىستىرۋ ۇناعانىمەن، بۇل ادىلەتسىز بولار ەدى. مەنىڭشە، ول ەشكىمگە ۇقسامايتىن ونەر ادامى» ، - دەدى ۇستاز.
ءانشى- كومپوزيتور ماقپال جۇماباي بريتانيالىق تالعامى جوعارى كورەرمەننىڭ كوڭىل كىلتىن تاپقانىنا ءدان ريزا. «كونسەرتتىڭ اياقتالعانىنا جارتى ساعات بولسا دا تىڭدارماندار كەلىپ، قۇشاقتاپ، كەيبىرى ءتىپتى جىلاپ جاتىر. مەنىڭشە، ونەر بارشاعا ورتاق ءتىل، ادام جانىنىڭ ءتىلى ءبىر ەكەندىگىن كورسەتەدى» ، - دەدى ول.
كونسەرت الاڭى رەتىندە برۋنەل مۇراجايى تاڭدالىپ الىندى. عيماراتتىڭ ىشكى قابىرعاسىنا اعىلشىن تىلىنە ءتارجىمالانعان ءان ماتىندەرى شىعارىلىپ تۇردى. ماقپال اندەرىن ادەبي اعىلشىن تىلىنە ءتارجىمالاعان اۋدارماشى دەۆيد كۋك: «قازاق پوەزياسىمەن تانىسقان از ۋاقىتتىڭ ىشىندە ونىڭ قانشالىقتى اۋەزدى ەكەنىن اڭعاردىم. سوندىقتان اعىلشىن تىلىندە اۆتور ماقامدارىنىڭ سۇلۋلىعىن بارىنشا جوعارى دەڭگەيدە جەتكىزۋگە تىرىستىم» ، - دەدى.
لوندونداعى كونسەرت شەتەلدىك مۋزىكالىق نارىقتى زەرتتەۋگە ارنالعان ەكسپەريمەنت ءتارىزدى. قازىردىڭ وزىندە ارىپتەستىك ورناتۋ بويىنشا بىرنەشە ۇسىنىس بار جانە الداعى ۋاقىتتا ماقپالدىڭ جۇلدىزى شەتەلدە جانۋى مۇمكىن.
