پرەزيدەنتتىڭ كىتابىن حالىق التى كۇن تويلادى

نۇر-سۇلتان. قازاقپارات - كىتاپتى ءوزى جازدى ما، وزگەلەر جازىپ بەردى مە، ول ەندى باسقا اڭگىمە.

تۇرىكمەن ەلى التى كۇننەن بەرى پرەزيدەنت گۋربانگۋلى بەردىمۇحامەدوۆتىڭ «تۇرىكمەن الابايى» اتتى كىتابىن تويلاپ جاتىر.

وسىعان بايلانىستى ەلدىڭ ءار تۇكپىرىندە سالتاناتتى جاعدايدا ءىس-شارالار وتۋدە. ەڭ الدىمەن اتالعان كىتاپتىڭ تۇساۋكەسەرى مينيسترلەر كابينەتىندە ءوتىپ، پرەزيدەنت مينيسترلەرگە تۋىندىسىن سىيعا تارتتى. سودان كەيىن پرەزيدەنت الاباي تۋرالى جازعان ءوز ولەڭىن وقىدى. ودان كەيىنگى شارا ەلدىڭ سالتاناتتى سارايىندا ءوتتى. وعان ەلدىڭ ماقتاۋلى ازاماتتارى ارنايى شاقىرىلدى. وسى ءىس-شارادا پرەزيدەنتتىڭ سوزىنە جازىلعان «تۇرىكمەن الابايى» اتتى ءان ورىندالدى.

ءۇشىنشى كۇنى قوعامدىق ۇيىمنىڭ ورتالىعىندا وتكەن جيىندا ءسوز سويلەگەندەر پرەزيدەنت جازعان «تۇرىكمەن الابايى» مەن بەردىمۇحامەدوۆ قولتاڭباسىنىڭ ەرەكشەلىگىنە توقتالدى. وعان ەلدەگى بارلىق مينيسترلەر، پارتيا مۇشەلەرى، ب ا ق وكىلدەرى مەن اۋداندىق دەڭگەيدەگى دەپۋتاتتارعا دەيىن قاتىستى.

ءتورتىنشى كۇنى پرەزيدەنت گۋربانگۋلى بەردىمۇحامەدوۆ سىرتقى ىستەر مينيسترلىگىندە بۇكىل ەلشىلەردى جيناپ، الاباي ءيتىنىڭ ارتىقشىلىقتارى تۋرالى ءسوز ەتتى. بەسىنشى كۇنى اۋىل شارۋاشىلىعى كەشەنىنىڭ كونفەرەنس زالىنا جينالعاندار ەلدەگى اۋىل شارۋاشىلىعى سالاسىنىڭ بارلىق ماماندارى تاعى دا بەردىمۇحامەدوۆتىڭ تۇرىكمەن حالقىنا بەرەرى كوپ ەكەنىن ايتىپ تاراستى.

ال التىنشى كۇنى پرەزيدەنتتىڭ بالاسى احال ۋالاياتىنىڭ حوكيمى سەردار بەردىمۇحامەدوۆ الاباي تۇقىمىن وسىرەتىن ارنايى شارۋاشىلىقتىڭ اشىلعانىن جاريا ەتتى. ءسويتىپ، گۋربانگۋلى بەردىمۇحاموۆتىڭ شابارماندارى التى كۇن بويى كورەگەن باسشىنىڭ تۇرىكمەن الابايىنىڭ ارتىقشىلىعى تۋرالى جازعان كىتابىن جىر قىلدى. ال گۋربانگۋلى بەردىمۇحامەدوۆ بۇل كىتاپتى 2 اي 18 كۇن جازعان كورىنەدى. ...كىتاپتى ءوزى جازدى ما، وزگەلەر جازىپ بەردى مە، ول ەندى باسقا اڭگىمە.

«قامشى» سىلتەيدى