اسقار مامين جاڭا جۇمىس ورىندارىن اشۋ بويىنشا تاپسىرما بەردى

نۇر- سۇلتان. قازاقپارات - بۇگىن ۇكىمەت وتىرىسىندا پرەمەر- مينيستر اسقار مامين «باستاۋ- بيزنەس» جوباسىنا قاتىسۋشىلار ۇلەسىن ارتتىرۋ ماسەلەسىن پىسىقتاۋدى تاپسىردى، دەپ حابارلايدى قازاقپارات ءتىلشىسى.

«بۇگىن تالقىلانعان «باستاۋ- بيزنەس» ، «جاس كاسىپكەر» ، شاعىن نەسيە بەرۋ جوبالارىنىڭ ىسكە اسىرىلۋ ماسەلەلەرى حالىقتىڭ جۇمىسپەن قامتىلۋىمەن تىعىز بايلانىستى. بۇل ءوز كەزەگىندە ەلباسى مەن مەملەكەت باسشىسىنىڭ العا قويعان باستى مىندەتتەردىڭ ءبىرى. وسى جۇمىستىڭ جاقسى ناتيجەلەرىن كورىپ وتىرمىز. بيىلدىڭ وزىندە عانا 5 مىڭنان استام ازامات ءوز ءىسىن اشىپ، 8,5 مىڭ جۇمىس ورنىن قۇردى» ، - دەپ اتاپ ءوتتى ۇكىمەت باسشىسى.

سونىمەن قاتار ا. مامين جىلدىڭ اياقتالۋىنا از ۋاقىت قالعانىن ايتا كەلە، شاعىن نەسيە بولۋگە بەرىلگەن 82 ميلليارد تەڭگەنىڭ 50 پايىزى عانا يگەرىلگەنىن اتاپ ءوتتى. بۇل تۇرعىدا الماتى، ماڭعىستاۋ وبلىستارى جانە شىمكەنت قالاسى ارتتا قالىپ وتىر. وسى وڭىرلەر بيۋدجەت قاراجاتىن ءتيىمدى يگەرگەن پاۆلودار، شىعىس قازاقستان جانە قىزىلوردا وبلىستارىنان ۇلگى الۋى كەرەكتىگى ايتىلدى.

«سوندىقتان ەڭبەك جانە حالىقتى الەۋمەتتىك قورعاۋ، ۇلتتىق ەكونوميكا، اۋىل شارۋاشىلىعى مينيسترلىكتەرىنە «اتامەكەن» ۇ ك پ- مەن بىرگە ەكى اپتا مەرزىمدە «باستاۋ- بيزنەس» جوباسى اياسىندا شاعىن نەسيە بەرۋ بويىنشا جاعدايدى تالداپ، ۇسىنىستاردى ەنگىزۋدى تاپسىرامىن» ، - دەدى ۇكمەت باسشىسى.

مۇنىمەن قوسا، پرەمەر- مينيستر «باستاۋ- بيزنەس» جوباسىنا قاتىسۋشىلاردىڭ سانىن ۇلعايتىپ، بيزنەسىن اشقاندار نەمەسە كەڭەيتكەندەر سانىن 20 دان 30 پايىزعا دەيىن جەتكىزۋ ماسەلەسىن پىسىقتاۋدى جۇكتەدى.

بۇدان بولەك ول قازاقستاندىق قامتۋ ماسەلەسىنە ەرەكشە نازار اۋدارۋ كەرەكتىگىن قاداپ ايتتى.

«مينيسترلەر مەن اكىمدەرگە قازاقستاندىق قامتۋ بويىنشا كورسەتكىشتەردىڭ جانە ءتيىستى زاڭنامانىڭ ورىندالۋى بويىنشا دەربەس جاۋاپكەرشىلىك ارتىلادى. 9 ايدىڭ قورىتىندىسى بويىنشا جينالىس وتكىزەمىز. وندا وسى كورسەتكىشتەردىڭ ورىندالۋىن قاراستىرامىز» ، - دەدى اسقار مامين.