نۇر-سۇلتاننىڭ باس پوليتسەيى سەنبىدەگى زاڭسىز شەرۋدە ۇستالعاندار جايىندا ايتتى

None
None
نۇر-سۇلتان. قازاقپارات - بۇگىن نۇر-سۇلتان قالالىق پوليتسيا دەپارتامەنتىنىڭ باستىعى ەرجان سادەنوۆ 21- قىركۇيەك كۇنى ەلوردانىڭ رەسپۋبليكا داڭعىلىندا ۇيىمداستىرىلعان زاڭسىز شەرۋگە قاتىسقاندار جايىندا مالىمەت بەردى، دەپ حابارلايدى قازاقپارات ءتىلشىسى.

«قازاقستاندا تىيىم سالىنعان ەكسترەميستىك ۇيىم 21- قىركۇيەكتە زاڭسىز اكسيالار ۇيىمداستىرۋعا شاقىردى. پروكۋراتۋرانىڭ بىرنەشە رەت ەسكەرتۋىنە قاراماستان جەكەلەگەن ادامدار ارانداتۋشىلىققا ەرىپ، باسقا ازاماتتاردىڭ تىنىشتىعى مەن قاۋىپسىزدىگىنە قاۋىپ توندىرە وتىرىپ، قۇقىققا قارسى ارەكەتتەر جاساي باستادى. وسىعان بايلانىستى ىشكى ىستەر ورگاندارى قوعامدىق ءتارتىپتى بۇزۋدىڭ جولىن كەسۋ بويىنشا زاڭدا كوزدەلگەن شارالاردى قابىلدادى»، - دەدى ول.

ونىڭ اتاپ وتۋىنشە، رۇقسات ەتىلمەگەن شەرۋگە قاتىسىپ، قوعامدىق كولىكتەردىڭ قوزعالىسىنا كەدەرگى كەلتىرىپ، پوليتسيا قىزمەتكەرلەرىنىڭ تالابىنا باعىنباي، قارسىلىق كورسەتكەندەر پويلتسيا بولىمشەلەرىنە جەتكىزىلدى. ءتارتىپ بۇزۋشىلاردى ۇستاۋ بارىسىندا بارىنشا دۇرىس جۇرگىزىلدى، ارنايى قۇرالدار قولدانىلعان جوق.

«نۇر-سۇلتان قالاسى بويىنشا بارلىعى 50 گە جۋىق ءتارتىپ بۇزۋشى جەتكىزىلدى. ونىڭ تورتەۋى اكىمشىلىك جاۋاپكەرشىلىككە تارتىلدى. قالعان ادامدار پروفيلاكتيكالىق اڭگىمەلەسۋدەن كەيىن ۇيلەرىنە جىبەرىلدى»، - دەدى ە. سادەنوۆ.

ەلوردانىڭ باس پوليتسەيى الەۋمەتتىك جەلىلەردە تاراعان جاس قىزدىڭ ۇستالعانى تۋرالى ۆيدەوعا قاتىستى دا تۇسىنىكتەمە بەردى.

«ول قىز 2000-جىلى تۋعان، جاسى 19 دا. بۇل قىز بىرنەشە رەت قوعامدىق ءتارتىپتى بۇزۋعا قاتىستى. زاڭسىز اكسيا كەزىندە پوليتسيا قىزمەتكەرلەرىنىڭ سانكسيالانباعان ميتينگكە قاتىسۋىن توقتاتۋ تۋرالى بىرنەشە تالابىنا قاراماستان ول قۇقىق قورعاۋ ورگاندارى قىزمەتكەرلەرىن اگرەسسياعا يتەرمەلەگەن. وسىعان بايلانىستى ول باسقا دا قۇقىق بۇزۋشىلارمەن بىرگە ۇستالدى. پوليتسيا بولىمشەسىندە پروفيلاكتيكالىق اڭگىمەلەسۋدەن كەيىن ۇيىنە جىبەرىلدى»، - دەدى دەپارتامەنت باسشىسى.


سوڭعى جاڭالىقتار