قازاقستاندا مۇناي- حيميا وندىرىسىنە قىزىعۋشى ينۆەستورلار ارتىپ كەلەدى - ۆيتسە- مينيستر

نۇر- سۇلتان. قازاقپارات - ەنەرگەتيكا ۆيتسە- ءمينيسترى مۇرات جۇرەبەكوۆ قازاقستاننىڭ مۇناي- حيميا ونەركاسىبىن قالاي دامىتىپ جاتقانىن ايتىپ بەردى، دەپ حابارلايدى قازاقپارات ءتىلشىسى.

«ەنەرگەتيكا مينيسترلىگى ەرەكشە نازار اۋدارىپ وتىرعان تاعى ءبىر ماڭىزدى سالا - مۇناي- حيميا سالاسىن دامىتۋ، كومىرسۋتەگى شيكىزاتىن قايتا وڭدەپ، ونىمدەرىن شىعارۋ. وزدەرىڭىز بىلەتىندەي، مۇناي- حيميا سالاسىنداعى ءار دوللار ەكونوميكادا 2-3 دوللارلىق ءوسىمدى اكەلەدى جانە جاڭا 7 جۇمىس ورنىن اشۋعا ىقپال ەتەدى. ونەركاسىپتىڭ بارلىق سالاسى دەرلىك مۇناي- حيميا ونىمدەرىن تۇتىنادى: قۇرىلىس، ماشينا جاساۋ، ەنەرگەتيكا، اۋىل شارۋاشىلىعى، مەديتسينا، عارىش جانە باسقا سالالاردا ونىمگە سۇرانىس جوعارى»، - دەدى مۇرات جۇرەبەكوۆ ەلوردادا ءوتىپ جاتقان «ورتالىق ازياداعى مۇناي وڭدەۋ مەن مۇناي حيمياسى» اتتى حالىقارالىق كونفەرەنسيادا.

ونىڭ ايتۋىنشا، مۇناي- حيميا سالاسىنا ينۆەستيتسيا تارتۋ ءۇشىن مينيسترلىك مەملەكەتتىك قولداۋدى ۇسىنادى. ماسەلەن، قازىردىڭ وزىندە اتىراۋ وبلىسىندا سالىقتىق جانە كەدەندىك ارتىقشىلىقتارعا يە ارنايى مۇناي- حيميا ايماعى قۇرىلعان.

«مەملەكەت ينفراقۇرىلىم قۇرىلىسىن جۇرگىزۋدى قارجىلاندىرادى. ويتكەنى بۇل كاپيتالدى 20 پايىزعا جانە پايدالانۋ شىعىندارىن 15 پايىزعا دەيىن ازايتۋعا مۇمكىندىك بەرەدى. شەتەلدىك جۇمىس كۇشىن تارتۋ ءتارتىبى جەڭىلدەدى. وسىلايشا، ۆەدومستۆوارالىق كوميسسيا دەڭگەيىندە وتىنىشتەر ءبىر تەرەزە قاعيداتى نەگىزىندە قارالادى. بۇل باعىتتاعى جۇمىس رۇقسات بەرۋ مەرزىمىن ەكى جىلدان ءۇش ايعا دەيىن قىسقارتتى»، - دەدى ول.

مۇرات جۇرەبەكوۆ سونىمەن قاتار، جوبالاۋ مەن قۇرىلىستا حالىقارالىق ستاندارتتاردى قولدانۋ ماسەلەسى شەشىلگەنىن اتاپ ءوتتى.

«مەملەكەتتىك قولداۋ شارالارى ارقاسىندا قازاقستان بۇرىن وندىرىلمەگەن بەنزول (قۋاتى - جىلىنا 133 مىڭ توننا) جانە پاراكسيلول (قۋاتى - جىلىنا 500 مىڭ توننا) ءوندىرىسىن (2016 -جىلى) ىسكە قوستى. مۇناي- جول بيتۋمدارىنىڭ ءوندىرىسى 2013 -جىلى 200 مىڭ توننادان جىلىنا 800 مىڭ تونناعا دەيىن ءتورت ەسە ءوستى. بۇل جول سالاسىنىڭ ىشكى سۇرانىسىن تولىق قامتاماسىز ەتەدى. 2018 -جىلى قۋاتى جىلىنا 2,6 ميلليارد دوللارلىق پوليپروپيلەن وندىرۋگە ارنالعان گاز- حيميا كەشەنىنىڭ قۇرىلىسى باستالدى. جىل سايىن قازاقستاندا مۇناي- حيميا وندىرىسىمەن اينالىسقىسى كەلەتىن ينۆەستورلاردىڭ سانى ارتىپ كەلەدى. قازىرگى ۋاقىتتا جالپى سوماسى شامامەن 5 ميلليارد ا ق ش دوللارىن قۇرايتىن 10-نان استام جوبا ءارتۇرلى دامۋ ساتىسىندا تۇر. ولاردى جۇزەگە اسىرۋدىڭ نەگىزگى ماسەلەسى - جوبالاردى شيكىزاتپەن قامتاماسىز ەتۋ»، - دەدى مۇرات جۇرەبەكوۆ.

اۆتور: ايان بەكەن ۇلى