شاي ميعا جاقسى اسەر ەتەدى - زەرتتەۋ
اۆتوردىڭ ايتۋىنشا، شايدىڭ پايداسى مەن زيانى تۋرالى زەرتتەۋلەردىڭ كوبى نەيروپسيحولوگيالىق ادىستەرگە نەگىزدەلگەن، ال بۇل توپ نەيروۆيزۋاليتسيا ارقىلى زەرتتەۋ جۇرگىزگەن.
«زەرتتەۋگە قاتىسۋشىلار ەكى توپقا ءبولىندى. ءبىر توپتا شايدى كوپ ىشەتىندەر، ال ەكىنشى توپتا شايدى مۇلدەم ىشپەيتىندەر نەمەسە سيرەك ىشەتىندەر بولدى. ايتا كەتەرلىگى، ءبىرىنشى توپتاعى 30 ادام سوڭعى جيىرما بەس جىلدا ەڭ كەم دەگەندە اپتاسىنا ءتورت رەت شاي ىشكەن. ولاردىڭ جاسى الپىستان اسادى. زەرتتەۋ بارىسىندا قاتىسۋشىلاردىڭ دەنساۋلىعى، ءومىر سالتى مەن پسيحولوگيالىق احۋالى ەسكەرىلگەن، سونداي- اق ولار نەيروپسيحولوگيالىق تەستىدەن وتكەن. سونىمەن قاتار، ءار قاتىسۋشىنىڭ ميى ماگنيتتى رەزونانستى توموگرافيا ارقىلى سكانەرلەنگەن»، دەپ جازىلعان ماقالادا.
ناتيجەسىندە شايدى كوپ ىشەتىن توپتاعى ادامداردىڭ ميىنداعى نەيروندى بايلانىس تيىمدىلىگى ەكىنشى توپقا قاراعاندا جاقسىراق بولىپ شىققان.
«مي بولىكتەرىنىڭ اراسىنداعى بايلانىس ءتيىمدى بولعان سايىن اقپاراتتى وڭدەۋ دە جاقسى بولادى»، دەيدى زەرتتەۋ توبىنىڭ باسشىسى لەي فەن. ونىڭ ايتۋىنشا، شاي كوگنيتيۆتى قىزمەتتەرگە دە جاقسى اسەر ەتەدى. كونيتيۆتى قىزمەت پەن مي قۇرىلىمى تىعىز بايلانىستى بولعاندىقتان، ەندى عالىمدار شايدىڭ قۇرامىنداعى بيولوگيالىق بەلسەندى زاتتاردىڭ ينتەللەكتىگە اسەرىن زەرتتەپ كورمەك.
اۆتور: ايكۇمىس بولاتبەك