حالىقارالىق «تۇركى الەمىن توعىستىرعان - سىر ەلى» فەستيۆالى ءوتتى

قىزىلوردا. قازاقپارات - قىزىلوردا وبلىسىندا تۇركىتىلدەس ەلدەر جاستارىنىڭ حالىقارالىق «تۇركى الەمىن توعىستىرعان - سىر ەلى» فەستيۆالى وتكىزىلدى، دەپ حابارلايدى قازاقپارات ءتىلشىسى.

اتالمىش يگى شارا تۇڭعىش پرەزيدەنت - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى بويىنشا ۇيىمداستىرىلدى. سوڭعى كۇندەرى سىر وڭىرىندە «قورقىت جانە ۇلى دالا سازى» حالىقارالىق فولكلورلىق-مۋزىكالىق ونەر فەستيۆالى وتكىزىلگەن ەدى. سول شارا بارىسىندا تۇركىتىلدەس ەلدەر جاستارى سىر توپىراعىندا باس قوستى.

بۇل شارا جاستار جىلى اياسىندا قولعا الىنىپ وتىر. ونى وتكىزۋگە وبلىستىق جاستار ساياساتى ماسەلەلەرى باسقارماسىنىڭ قولداۋ ءبىلدىردى. وعان ەلىمىزدىڭ بارلىق وڭىرىنەن جينالعان جاستارمەن بىرگە تۇركيا، تاتارستان، قىرعىزستان، باشقۇرستان جانە ازەربايجان ەلدەرىنىڭ شىعارماشىل جانە ونەرپاز جاستارى قاتىستى.

«حالىقارالىق شارانىڭ ماقساتى - تۇركىتىلدەس ەلدەر جاستارىنىڭ قارىم-قاتىناسىن نىعايتۋ، ورتاق تاريحى مەن رۋحاني قۇندىلىقتارىن ناسيحاتتاۋ، جاستار ساياساتىندا وڭ باستامالار بويىنشا جاستاردىڭ باسىن قوسىپ، تاجىريبە الماسۋ، ىشكى تۋريزمدى دامىتۋعا جاڭا مۇمكىندىك اشۋ، قاسيەتتى سىر ەلى - كيەلى ولكەنىڭ تاريحىمەن تانىستىرۋ»، - دەپ اتاپ ءوتتى اتالمىش شارانى ۇيىمداستىرۋشىلار.

جاستار فەستيۆالىنە كەلگەن مەيماندار قىزىلوردا قالاسىندا ورىن تەپكەن «رۋحاني جاڭعىرۋ» مۇراجايىمەن تانىستى. سونداي-اق، وبلىستىق تاريحي ولكەتانۋ مۋزەيىندە جانە قالامىزدىڭ سول جاعالاۋىندا بوي كوتەرگەن «جاستار ورتالىعى» جاڭا عيماراتىندا بولدى. سونىمەن قاتار، ق ر اقپارات جانە قوعامدىق دامۋ مينيسترلىگىنىڭ جاستار جانە وتباسى كوميتەتى، وبلىستىق اسسامبلەيانىڭ ەتنو-مادەني ورتالىعىنىڭ جاستارى جانە وبلىستىڭ بەلسەندى جاستارىمەن بىرگە كەزدەسۋ ءوتتى. كەزدەسۋدەن سوڭ جاستار ا. توقماعامبەتوۆ اتىنداعى قالالىق مادەنيەت ۇيىندە ۇيىمداستىرىلعان كونسەرتتىك باعدارلاماسىن تاماشالادى.

بۇدان بۇرىن قىزىلوردادا قورقىت مۇرالارى جونىندە عىلىمي كونفەرەنسيا ءوتتى.