ءدىن ماماندارى قوعامدىق ورىنداردا ورامال تاعۋدىڭ تارتىپتەرىن ءتۇسىندىردى

الماتى. قازاقپارات - قوعامدا ايەلدەردىڭ جانە وقۋشى قىزداردىڭ ورامال تاعۋ ماسەلەسى قوعامدىق دامۋ باسقارماسىنىڭ ۇيىمداستىرۋىمەن وتكەن جيىندا ايتىلدى، دەپ حابارلايدى قازاقپارات.

اتالعان جيىن تۇرىكسىب اۋدانىنىڭ اكىمدىگىندە ءوتتى.

ارنايى قۇرىلعان كوميسسيا مۇشەلەرى ورامال تاعاتىن وقۋشىلاردىڭ اتا- انالارىمەن جەكە- جەكە جۇزدەستى.

پروكۋراتۋرا، اكىمدىك، پسيحولوگ، زاڭگەر، قۇقىق قورعاۋ ورگاندارى تەولوگ قاتىسقان جيىن

«زايىرلى مەملەكەتىمىزدە ءدىن مەن قوعامنىڭ ارا قاتىناسى. ءداستۇرلى قۇندىلىقتار جانە رۋحاني تاربيە ساباقتاستىعى» دەگەن تاقىرىپتاردى قامتىدى.

بۇل جيىننىڭ ءبىر ەرەكشەلىگى، بۇعان دەيىن ورامال تاققان وقۋشىلاردىڭ اتا- انالارىمەن جالپىلاي جيىن وتەتىن بولسا، بۇل جولى ءار اتا- انامەن جەكە سۇحبات جۇرگىزىلدى.

ءال- فارابي اتىنداعى قازاق ۇلتتىق ۋنيۆەرسيتەتى ءدىن تانۋ جانە مادەنيەتتانۋ كافەدراسىنىڭ اعا وقىتۋشىسى، PhD دوكتورى قۇدايبەردى باعاشاروۆ «قر ءبىلىم جانە عىلىم مينيسترلىگىنىڭ 2016 -جىلعى14 - قاڭتارداعى №26 ورتا ءبىلىم بەرەتىن وقۋ ورىندارىنداعى مەكتەپ فورماسى تۋرالى بۇيرىعىن»، قازاقستان رەسپۋبليكاسىنىڭ «ءدىني قىزمەت جانە ءدىني بىرلەستىكتەر تۋرالى زاڭىن» ، «اكىمشىلىك قۇقىق بۇزۋشىلىق تۋرالى كودەكسىن» كەلۋشىلەرگە ءتۇسىندىردى.

اتا- انالار دا ءوز كەزەگىندە ۋاجدەرىن ايتىپ، ءوز نارازىلىقتارىندا ءبىلدىرىپ جاتتى.

دەگەنمەن بۇعان دەيىن دە مەكتەپ ديرەكتورلارى مەكتەپ قابىرعاسىندا ورامال تاعاتىن وقۋشى قىزداردىڭ اتا- انالارىمەن جۇمىس جۇرگىزگەندىگى، مەكتەپتەردە وقۋشىلاردىڭ ورامال تاعۋىنا رۇقسات ەتىلمەيتىنىن جاقسى بىلەتىندەرى اڭعارىلدى.

جينالعان ماماندار جۇمىسىنىڭ ناتيجەسىندە كەيبىر اتا- انالار قىزدارىنا ورامالدارىن شەشكىزەتىندەرىن ەندى بىرەۋلەرى ءوز ۇستانىمدارىنان قايتپايتىندارىندا ايتتى.

ماماندار ورتا ءبىلىم بەرۋ ۇيىمدارىندا ءبىلىم الۋشىلاردىڭ كيىم كيۋ ۇلگىسى ءبىلىم بەرۋ ۇيىمدارىنىڭ ىشكى ءتارتىپ قاعيدالارىمەن، ءبىلىم بەرۋ ۇيىمىنىڭ جارعىسىمەن، سونداي- اق ورتا ءبىلىم بەرۋ ۇيىمدارى ءۇشىن مىندەتتى مەكتەپ فورماسىنا قويىلاتىن تالاپتارمەن رەتتەلەتىنىن ايتتى.

ولاردىڭ ايتۋىنشا، ورتا ءبىلىم بەرۋ ۇيىمدارىنىڭ مىندەتتى مەكتەپ فورماسى وقىتۋدىڭ زايىرلى سيپاتىنا سايكەس كەلەدى. «مەكتەپ فورماسىنىڭ ءتۇسى كلاسسيكالىق ستيلدە، مەكتەپ فورماسى قالىپتى جانە اشىق ەمەس تۇستەردەن تاڭدالادى. اتاپ ايتقاندا، قازىرگى تالاپتار بويىنشا ۇلداردىڭ مەكتەپ فورماسىنا «پيدجاك»، «جيلەت»، شالبار، مەرەكەلىك جەيدە، كۇندەلىكتى جەيدە (قىسقى مەزگىلدە: «تريكوتاج جيلەت» ، «ۆودولازكا» ) كىرەدى. ۇلدارعا ارنالعان شالبارلار ەركىن پىشىمدە تىگىلگەن جانە ۇزىندىعى بويىنشا توبىقتى جاۋىپ تۇرادى. ال قىزداردىڭ مەكتەپ فورماسىنا «پيدجاك» ، «جيلەت» ، بەلدەمشە، شالبار، كلاسسيكالىق جەيدە (قىسقى ۋاقىتتا: «تريكوتاج جيلەت» ، «سارافان» ، «ۆودولازكا» ) كىرەدى. قىزدارعا ارنالعان شالبارلار دا ەركىن پىشىمدە تىگىلگەن جانە ۇزىندىعى بويىنشا توبىقتى جاۋىپ تۇرادى»، - دەدى ءدىنتانۋشى مامان.

كەزدەسۋ ەركىن پىكىر الماسۋ تۇرىندە ءوتتى.

اۆتور: گۇلميرا عوسمانالي