امانگەلدى ايتالى: نەمەرەمدى ورىسشا سويلەتپەي، قازاقشا تاربيەلەپ ءجۇرمىن
ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ جاستار سارايىندا قوعام قايراتكەرى، فيلوسوفيا عىلىمىنىڭ دوكتورى، پروفەسسور امانگەلدى ايتالىنىڭ 80 جاس مەرەيتويىنا ارنالعان سالتاناتتى شارا وتەدى.
وعان ەلىمىزدىڭ بەلگىلى قوعام قايراتكەرلەرى، شىعارماشىلىق زيالى قاۋىم وكىلدەرى ولجاس سۇلەيمەنوۆ، مۇحتار شاحانوۆ، ءاليحان بايمەنوۆ، حانبيبي ەسەنعارا قىزى، يراك ەلەكەيەۆ، كەنجەعالي مىرجىقباي، عاريفوللا انەس، اسىلبەك سماعۇلوۆ، سابىر قاسىموۆ قاتىستى. ال وبلىس اكىمى وڭداسىن ورازالين پرەزيدەنت قاسىم - جومارت توقايەۆتىڭ قۇتتىقتاۋ حاتىن جەتكىزدى.
«كورنەكتى مەملەكەت جانە قوعام قايراتكەرى، بىلىكتى عالىم، بەلگىلى ۇستاز، ۇلتجاندى تۇلعا رەتىندە ەل دامۋىنا قوسقان ۇلەسىڭىز وتە كوپ. قازاق رۋحانياتى تۋرالى ايتقان سالماقتى ويلارىڭىز بەن پاراساتتى پايىمدارىڭىز وسكەلەڭ ۇرپاققا جول كورسەتەر قۇندى دۇنيەلەر دەپ بىلەمىز. ۇزاق جىلدار بويى ۇستازدىق ەتتىڭىز، شاكىرت تاربيەلەۋ ءىسىن ابىرويلى اتقارعان جانسىز. عىلىم جولىنداعى ەڭبەكتەرىڭىز دە ءبىر توبە. پارلامەنت ءماجىلىسى قابىرعاسىندا اتقارعان ەلەۋلى قىزمەتىڭىزدى قالىڭ جۇرتشىلىق جاقسى بىلەدى. زاڭ شىعارۋ ىسىنە بەلسەنە ارالاسىپ، ەلىمىزدىڭ قوعامدىق، ساياسي ومىرىنە سىڭىرگەن ەڭبەگىڭىز جاس بۋىن ءۇشىن جاقسى ونەگە»، - دەپ جازىلعان حاتتا.
سونىمەن قاتار، ق ر پارلامەنت ءماجىلىسىنىڭ ءتوراعاسى نۇرلان نىعماتۋللين، ءبىلىم جانە عىلىم ءمينيسترى اسحات ايماعامبەتوۆتىڭ قۇتتىقتاۋى وقىلدى.
ايتا كەتەيىك، اقىن مۇحتار شاحانوۆ ءوزىنىڭ ولەڭىن ارناسى، ءاليحان بايمەنوۆ ابىز سوزىنە توقتالدى.
«كوزى اشىقتىڭ كوكىرەگىن وياتاتىن، كوكىرەگى وياۋدىڭ كوزىن اشاتىن، ەكىجاقتى تەپە- تەڭدىكتى ۇستايتىن ۇلى ويشىل امانگەلدى ءابدىراحمان ۇلىنىڭ قوعامدىق، ساياسي رەسپۋبليكالىق ساحناعا شىعىپ، قازاق ۇلتىنا ءوزىنىڭ كەمەڭگەر سوزدەرىن ايتۋى ءبىزدىڭ ۇلتتىڭ قاجەتتىلىگى ەدى. سول قاجەتتىلىكتى ابەكەڭ وتەي ءبىلدى. مەن ونى جەلماياسى قىلىپ ءمىنىپ جۇرگەن رۋحانياتتىڭ اسان قايعىسى دەپ بىلەمىن. شىن مانىندە كوڭىلىمىز جايلانىپ، ءوزىمىزدى تولىققاندى ابىرويلى ۇلت رەتىندە سەزىنەتىن كەڭىستىكتىڭ ەمەس، رۋحاني ىزدەنىس، دۇنيەتانىم ورنىن ىزدەپ ءجۇر»، - دەدى مەملەكەت، قوعام قايراتكەرى ءاليحان بايمەنوۆ.
امانگەلدى ايتالى ءوز العىسىن ءبىلدىرىپ، ءوزىنىڭ باقىتتى ەكەنىن جەتكىزدى.
«ءومىردىڭ مەنەن العانى دا، بەرگەنى دە كوپ. مەن بۇگىن، 80-گ كەلگەن كۇنىمدە باقىتتىمىن. ءبىراق فرانسۋزدىڭ فيلوسوفى ۆولتەر ايتادى: «ءارۋاقىتتا دا مەن بۇگىن باقىتتىمىن دەڭىز، ەرتەڭگى كۇن تاعدىردىڭ قولىندا» دەپ. بۇگىن ەلدىڭ قۇرمەتىنە بولەنىپ وتىرمىن، ريزامىن. ەكى ۇلىم، ءبىر قىزىم بار. اقسۇڭقار دەگەن نەمەرەمدى تاربيەلەپ ءجۇرمىن. ءبىز ءۇشىن قىزىق، ءبىز ءۇشىن ەكسپەرەمەنت. قازاقشا تاربيەلەيمىن، ورىسشا سويلەتپەيمىن»، - دەدى امانگەلدى ايتالى.
امانگەلدى ايتالىعى ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ قۇرمەتتى پروفەسسورى توسبەلگىسى تاعىلدى.
فوتو: kerek-info.kz
اۆتور: التىناي ساعىندىقوۆا