كۇرەس: داۋلەت نيازبەكوۆ كۇمىس مەدال يەگەرى اتاندى

نۇر- سۇلتان. قازاقپارات - ەلوردا تورىندە كۇرەس تۇرلەرىنەن ءوتىپ جاتقان ليتسەنزيالىق الەم چەمپيوناتىندا ەركىن كۇرەستەن قازاقستاندىق بالۋان داۋلەت نيازبەكوۆ كۇمىس جۇلدەگەر اتاندى، دەپ حابارلايدى قازاقپارات ءتىلشىسى.

65 كەلىگە دەيىنگى سالماقتا ەل نامىسىن قورعاعان نيازبەكوۆ بۇگىن فينالدا رەسەي بالۋانى گادجىمۋرات راشيدوۆتان جەڭىلىپ قالدى. راشيدوۆ جەرلەسىمىزدى 11:0 ەسەبىمەن ۇتىپ، تازا جەڭىسكە قول جەتكىزدى. وسىلايشا، بۇگىندە 20  جىل كۇتكەن ساپ «التىن» قازاق بالۋاندارىنا ۇستاتپاي كەتتى. الايدا، داۋلەت جەڭىس تۇعىرىنىڭ ەڭ بيىك ساتىسىنان كورىنە الماسا دا، قورجىنىندا توكيو 2020 وليمپياداسىنىڭ جولداماسى مەن كۇمىس جۇلدەسى بار.

ەندى ەرتەڭ تاعى ءبىر بالۋانىمىزدىڭ جولىنا ۇمىتپەن قارايمىز. بۇگىن ەركىن كۇرەستەن 70 كەلى سالماق دارەجەسىندە وتانداسىمىز نۇرعوجا قايپانوۆ فينالعا شىققان بولاتىن.

اۆتور: كۇنسۇلتان وتارباي