اباي اتىنداعى كوركەمسوز بايقاۋىنىڭ جەڭىمپازدارى انىقتالدى
ءىلياس جانسۇگىروۆ اتىنداعى مادەنيەت سارايىندا وتكەن بايقاۋدى مادەنيەت جانە سپورت مينيسترلىگىنىڭ ءتىل ساياساتى كوميتەتى ۇيىمداستىردى.
كوركەمسوز وقۋ شەبەرلەرىنىڭ رەسپۋبليكالىق بايقاۋىنا ەلىمىزدىڭ وبلىستارى جانە نۇر- سۇلتان، الماتى، شىمكەنت قالالارىندا وتكەن كونكۋرستاردىڭ 16 جەڭىمپازى قاتىستى.
اسىرەسە، كورەرمەندەردى وقۋ شەبەرلىگىمەن ءتانتتى ەتكەن ايجان القابەك، ايسانا ءاشىمحان، ءمادي ساۋلەبەك، ەرلان نۇرلانوۆ، ءاليا بولاتوۆا، ەرباق قۇرمەتجان ءماتىندى مانەرىنە جەتكىزىپ كورەرمەن جۇرەگىنە جول سالدى. ولار قازاقتىڭ ءتول دىبىستارىن اشىق، ناقتى مانەرلى ءارى اۋەزدى جەتكىزدى.
ساحنا تورىندە بەيىمبەت ءمايليننىڭ، ساكەن سەيفۋلليننىڭ كوركەمدىگى جوعارى پروزالىق شىعارمالارىنان ءۇزىندى وقىلدى.
سونداي- اق ءسابيت دونەنتايەۆتىڭ، ءىلياس جانسۇگىروۆتىڭ جانە فاريزا وڭعارسىنوۆانىڭ پوەزيالىق شىعارمالارىنان وقىلعان جىر دەستەلەرى كوپشىلىك ءىلتيپاتىنا يە بولدى.
قازىلار القاسىنىڭ ءتوراعاسى بەلگىلى اقىن، مەملەكەتتىك سىيلىقتىڭ يەگەرى تىنىشتىقبەك ابدىكارىم، ادەبيەت سىنشىسى تۇرسىنجان شاپاي، ءداستۇرلى ءانشى ەرلان رىسقالي، تەاتر، كينو جانە دۋبلياج اكتەرى ازامات شارىن، پروفەسسور، فيلولوگيا عىلىمدارىنىڭ دوكتورى مۇراتبەك يمانعازينوۆ اباي اتىنداعى كوركەمسوز وقۋ شەبەرلەرىنىڭ جەڭىمپازدارىن انىقتادى.
بايقاۋدىڭ باس جۇلدەسى ايجان القابەككە بۇيىردى. ال، ءبىرىنشى جۇلدە ءمادي ساۋلەبەككە، ەكىنشى ەرباق قۇرمەتجانعا، ءۇشىنشى جۇلدە ەكەۋ ونى ءاليا بولاتوۆا مەن ايسانا ءاشىمحان ءوزارا ءبولىستى. جەڭىمپازدارى ديپلومدار جانە باعالى سىيلىقتارمەن ماراپاتتالادى.
ايتا كەتەرلىگى، بايقاۋ - قازاق ءتىلىنىڭ كوركەمدىك ەرەكشەلىگىن، باي سوزدىك قورىن ناسيحاتتاۋ، اباي جانە باسقا دا قازاق ادەبيەتى كلاسسيكتەرىنىڭ شىعارمالارىن ورىنداۋ ارقىلى قازاقتىڭ كوركەم ادەبيەتىنە جاستاردىڭ ىقىلاسىن ارتتىرۋدى كوزدەيدى.
