تاياۋدا وتاندىق «شوۋ- بيزنەستىڭ» جاڭا قالىپتاسقان كەزى تۋرالى تەلەحيكايا كورەرمەنگە جول تارتادى
«حابار» اگەنتىگى وتاندىق «شوۋ- بيزنەس» ۇعىمىنىڭ جاڭادان قالىپتاسقان كەزدەرى تۋرالى مەلودراما ءتۇسىرىپ جاتىر. بۇگىنگى تاڭدا «راۋزا» كارتيناسىنىڭ ءتۇسىرىلىم جۇمىسى تولىعىمەن اياقتالىپ، وڭدەۋ جۇمىستارىنان وتۋدە. تەلەحيكايا - 23 - قىركۇيەكتەن باستاپ كورەرمەنگە جول تارتادى. تۋىندىنىڭ باس پروديۋسەرى - بايان الاگوزوۆا.
تەلەحيكايادا بالا كەزدەن اۋەزدى انگە جانى قۇشتار راۋزا ەسىمدى بويجەتكەننىڭ ءومىرى مەن ونەر جولىندا جولىقتىراتىن سان ءتۇرلى ساتتەرى سۋرەتتەلەدى. تۋىندىدا وتاندىق شوۋ- بيزەستىڭ اياق الىسى، دامۋ كەزەڭدەرى، ونەردى ءومىرىم دەپ تاڭداعان باس كەيىپكەر راۋزانىڭ وسى جولدا جولىقتىراتىن قيىندىقتارى قامتىلادى. راۋزا - الىپ شاھار الماتىدان شالعايدا ورنالاسقان اۋىلداردىڭ بىرىندە دۇنيەگە كەلىپ، سول اۋىلدا وسەدى. بويجەتكەن - مەكتەپ قابىرعاسىندا وقىپ ءجۇرىپ اۋدانارالىق جارىستاردان جۇلدەلى ورىندار الادى. اتاقتى كومپوزيتورلاردىڭ كوزىنە ءىلىنىپ، الماتىعا اتتانۋ تۋرالى ۇسىنىس الادى. ءوزىن تەك ونەر جولىندا عانا ەلەستەتەتىن قىز - سۇيىكتىسى ارداقتىڭ ۇيلەنۋ تۋرالى ۇسىنىسىنا قاراماستان، الماتىعا اتتانادى.
باس قالانىڭ قاۋىرت تىرشىلىگىندە اسىعىڭنىڭ الشىسىنان ءتۇسۋى - لوتەرەيا بيلەتىنەن ۇتىس ۇتىپ الۋمەن تەڭ. ول ۇتىس بىرەۋگە بۇيىرسا، بىرەۋگە بۇيىرماۋى - زاڭدىلىق. ارمان قۋىپ، سول كەزدەگى ەلىمىزدىڭ استاناسى - الماتىعا كەلگەن راۋزا - مۋزىكالىق ۋچيليشەگە تۇسە الماي قالادى. كۇنكورىستىڭ امالىن جاساپ، ءبىراز ۋاقىت قارا جۇمىستىڭ باسىن شالادى. سونداي جۇمىستاردىڭ ءبىرى - مۇمكىندىگى شەكتەۋلى بولىپ قالعان مادەنيەت مينيسترلىگىنىڭ ەكس - وكىلىن كۇتۋ ەدى. راۋزا سول كىسىنىڭ نۇسقاۋىمەن اتاقتى «گۇلدەر» انسامبلىنە كوپ ۇزاماي كيىم سۋرەتشىسىنىڭ كومەكشىسى بولىپ جۇمىسقا ورنالاسادى. انشىلىكتى اڭساپ جۇرگەن راۋزانى ساحنادان ءبىر قادامدىق بۇل قىزمەتى - ونەر الەمىنە الدەقايدا جاقىنداتقانداي بولدى.
جاڭا جۇمىسىندا بويجەتكەن شالقار ەسىمدى كومپوزيتوردىڭ ۇزدىكسىز قولداۋىنا يە بولادى. ناتيجەسىندە، شالقار راۋزاعا ارناپ جوعارى سۇرانىسقا يە، قازىرگى تىلمەن ايتقاندا «حيت» ءانىن سىيلاپ، باس كەيىپكەر - ءاپ- ساتتە اتاق- داڭقتىڭ استىندا قالادى. ءبىراق، باسشىلىق ەكەۋىنىڭ بۇل ارەكەتتەرىن زاڭسىز دەپ تاۋىپ، جۇمىستان شىعارۋ تۋرالى قاۋلى قابىلدايدى.
ءبىرى تالانتتى ءانشى، ەكىنشىسى دارىندى كومپوزيتور. بار قيىندىقتى بىرگە وتكەرىپ كەلگەن شالقار مەن راۋزانىڭ ۇكىلەگەن ۇمىتتەرى اقتالىپ، 2000 -جىلداردىڭ وزىندە- اق، تانىمالدىلىقتىڭ ءتاجىن كيەدى. ۇزدىكسىز تۇسىرىلىمدەر، كونسەرتتەر، سۇحباتتار، تىڭدارماننىڭ شەكسىز ماحابباتى مەن قولداۋىنا يە بولعانى سونشالىق، ۋاقىت وتە راۋزا «جۇلدىز اۋرۋىنا» شالدىعادى. سەزىمىن سابىرمەن جەڭگەن شالقار - ىشىنەن تىنىپ، «سۇيىكتى» ءانشىسىنىڭ بۇرىنعى قالپىنا ورالعانىن كۇتۋمەن بولادى..
12 بولىمنەن تۇراتىن بۇل تەلەحيكايادان جارقىناي شالقار، قۋانىش كەرىمقۇلوۆ، ايدار اسقاربەك، المات ساقاتوۆ، روزا مۇقاتايەۆا، عازرەت ەرجانوۆ، شەرحان ءپىرنازار، اسان ءماجيت، اسقار جۇمابەك، ايگەرىم قايرات قىزى، زۋحرا سايپي، اقبوپە ءابدىراش، اقنيەت مەيىرجان قىزى، ەرلان ءالي جانە باسقا دا اكتەرلەردى كورە الاسىزدار.