قازاقستان جازۋشىلار وداعىنا مۇشە بولۋ ءۇشىن كىم بولۋىمىز كەرەك؟
ول كەزدە ن. ورازالين باسقاراتىن، كەزدەسكەندە امانداسساڭ، سالەمىڭدى يا ەستىمەيتىن، يا شىنىمەن دە سالەم بەرگىسى كەلمەيتىن. امانىڭدى المايتىن ادامعا «مۇشەلىككە الىڭىزشى» دەپ ايتۋدىڭ ءوزى ارتىق.
ءوزىم «مۇشەلىككە الىڭىزشى» دەپ ەشكىمگە جالىنعان ەمەسپىن... وداق باسشىلىعى اۋىسقان سوڭ ءبىر توپ جاستى قابىلداعانىن جاڭالىقتاردان كوردىك. تىزىمگە قوسىلماپپىز. قۇجات قابىلدايتىن اپايعا بارىپ: «اپاي، مەنى نەگە قوسپاعان؟» دەپ سۇرادىم.
وداق عيماراتىندا ءتوراعا ورىنباسارى دا كەزىگىپ قالدى. بۇل كىسىلەردەن «بۇل جولى جاسى ۇلكەندەردى عانا الدىق، جاستاردى «جاستار فورۋمىندا» قابىلدايمىز، كۇت، سەنى الادى» جانە «بۇل جولى جاستاردى عانا الدىق» دەگەن ەكى ءتۇرلى جاۋاپ ەستىدىم.
سودان ءوزىمنىڭ نە جاسقا، نە كارىگە جاتاتىنىمدى بىلمەي، اڭىرىپ قالعانىم راس... ءتايىرى، مۇشەلىكتە تۇرعان ەشتەڭە جوق. الماسا، قويسىن دەيمىز. «مەنى المادى» دەپ، ەشكىمگە ارىزدانبايمىز. ەندى مىنە، بۇگىن جاڭالىقتاردان ەلىمىزدە «جاستار فورۋمى» وتكەنىن، تاعى دا ءبىر توپ قالامگەرلەردى مۇشەلىككە قابىلداعانىن كوردىك. قۇتتى بولسىن!
ايتايىن دەگەنىم، ادامدى الداماي، توق ەتەر جاۋابىن بەرۋ كەرەك قوي. ماعان ەشتەڭە ەمەس، قازاقستان جازۋشىلار وداعىنىڭ مۇشەسى بولماسام، بىردەمەم كەمىپ قالمايدى. 2012 -جىلدان بەرى جاتقان دوكۋمەنتىمنەن ۇيات بولدى. جالعىز مەن ەمەس، كوپ جىل بۇرىن قۇجاتىن وتكىزگەن تالاي ادام مۇشەلىكتى كۇتە-كۇتە ۇمىتىپ تا كەتكەن شىعار. مەن دە ۇمىتايىن... ەندىگى مۇشەلىكتىڭ ءدامى دە، ءمانى دە جوق...
قازاقتىڭ جازۋشىلار وداعىنىڭ جاس باسشىلارى! مەن وداققا سىزدەردەن بۇرىن كەلگەنمىن. ءيا، سىزدەر اۋىلدا قوزى باعىپ، قوي باعىپ جۇرگەندە مەن انامنىڭ قۇرساعىندا جاتقانمىن. سول كەزدە انام، قازاقستانداعى بىرەگەي تالانت يەسى عالىم، فيزيك ماعريپا شوجەعۇل قىزى جازۋشىلاردىڭ جيىنىنا ۇزبەي قاتىساتىن دا، مەن قالامگەرلەردىڭ ايتقان ءسوزىن تۇگەل تىڭدايتىنمىن.
مۇزافار الىمبايەۆ، سىرباي ماۋلەنوۆ سياقتى اقساقالدارمەن بەس جاسىمدا، سىزدەردەن بۇرىن كەزدەسىپ، ماڭدايىمنان سيپاتقام. تەك ايتارىم، جازۋشىلار وداعى ەشكىمنىڭ جەكە مەنشىگى ەمەس. مۇشەلىككە قابىلداۋ قانداي كريتەريلەر بويىنشا جۇزەگە اسادى؟ بىرەۋلەردىڭ الدىمەن ءوتىپ، ال ءبىر بايقۇستاردىڭ شەگەرىلىپ قالا بەرۋىنە نە سەبەپ؟
وسىعان جاۋاپ بەرەتىن ادام بار ما؟ جىل سايىن مۇشەلىك جيىنىندا «كەرەك ەمەستەردىڭ» تىزىمىندە سىزىلىپ، كەتە بارادى ەكەم.
«ازيا فورۋمىنا جاپونيادان جازۋشى شاقىرىپ بەرشى» دەپ جاز بويى جازعان حاتتارىڭىز مەندە ساقتاۋلى. قازاق قازاققا كەرەك ەمەس زامان عوي. قازاققا كەرەك بولماساق تا، باسقاعا كەرەكپىز!
شارافات جىلقىبايەۆا حيروشيماداعى جاپونيا-ەۋرازيا وداعىنىڭ مۇشەسى.
qamshy.kz