بۋداپەشتتە تۇركى كەڭەسىنىڭ كەڭسەسى اشىلدى

بۋداپەشت. قازاقپارات - قازاقستان رەسپۋبليكاسىنىڭ تۇڭعىش پرەزيدەنتى- ەلباسى ن. نازاربايەۆتىڭ باستاماسىمەن قۇرىلعان تۇركى كەڭەسى ماجارستاندا وكىلدىگىن اشتى.

بۇل تۋرالى قازاقستاننىڭ ماجارستانداعى ەلشىلىگى ءوزىنىڭ Facebook پاراقشاسىندا جاريا ەتتى.

2019-جىلعى 19- قىركۇيەكتە بۋداپەشتتە تۇركىتىلدەس مەملەكەتتەر ىنتىماقتاستىعى كەڭەسىنىڭ (ت م ى ك) سىرتقى ىستەر مينيسترلەرى كەڭەسىنىڭ وتىرىسى مەن ماجارستاندا ت م ى ك وكىلدىگىن اشۋ سالتاناتى بولدى.

شاراعا تۇركيانىڭ سىرتقى ىستەر ءمينيسترى ميەۆليۋت چاۆۋشوگلۋ، ۆەنگريانىڭ سىرتقى ىستەر جانە سىرتقى ساۋدا ءمينيسترى پەتەر سيارتو، قىرعىزستاننىڭ سىرتقى ىستەر ءمينيسترى چينگيز ايداربەكوۆ، ازەربايجاننىڭ سىرتقى ىستەر ءمينيسترى ەلمار مامەدياروۆ، قازاقستاننىڭ ۆەنرياداعى ەلشىسى نۇرباح رۇستەموۆ جانە تۇرىك كەڭەسىنىڭ حاتشىسى باعدات امىرەيەۆ قاتىستى.

جيىندا سويلەگەن سوزىندە تۇركيانىڭ سىرتقى ىستەر ءمينيسترى ميەۆليۋت چاۆۋشوگلۋ: «بۇگىنگى شارا تۇركىتىلدەس مەملەكەتتەر ءۇشىن ايتۋلى وقيعا. تۇركىتىلدەس مەملەكەتتەردىڭ ىنتىماقتاستىق كەڭەسى كەڭسەسىنىڭ اشىلۋى تۇرىك كەڭەسىنە ەرەكشە ماڭىز بەرىپ وتىر. ءبىزدىڭ وتباسىمىز ءوسىپ كەلەدى، تۇرىك كەڭەسى اسىرەسە ساۋدا، كەدەن ءىسى جانە ينفراقۇرىلىمدى دامىتۋ باعىتىندا ماڭىزدى ءرول اتقارادى»، - دەدى.

وسى رەتتە تۇركيا مەن ۆەنگريا اراسىنداعى قارىم-قاتىناستاردىڭ جوعارى دەڭگەيدە ەكەندىگىن اتاپ وتكەن تۇركيالىق مينيستر، كونە تۇرىك داستۇرلەرىنىڭ ساقتالىپ قالۋىنا تاپ وسى ۆەنگريانىڭ ماڭىزدى ءرول اتقارعاندىعىن جەتكىزدى.

جيىن بارىسىندا بۋداپەشتتە ت م ى ك وكىلدىگىن اشۋ تۋرالى مەموراندۋمعا قول قويىلدى.

ءوز سوزىندە ق ر ماجارستانداعى ەلشىسى ن. رۇستەموۆ ق ر تۇڭعىش پرەزيدەنتى- ەلباسى ن. نازاربايەۆتىڭ تۇركى ۇيىمى- ت م ى ك قۇرۋعا قوسقان قوماقتى ۇلەسىن ايرىقشا اتاپ ءوتتى. سونىمەن قاتار، ن. رۇستەموۆ ەلباسىنىڭ «ۇلى دالانىڭ جەتى قىرى» اتتى ماقالاسىنا ساي قازاقستان تۇركى الەمىنىڭ رۋحاني ورتالىعى مەن بەسىگى ەكەنىن، باسقا ەلدەر مەن وڭىرلەردىڭ تاريحي پروتسەستەرىنە ەلەۋلى ۇلەس قوسقان تۇركى تايپالارى مەن حالىقتارىنىڭ كۇللى دۇنيەگە تاراعانىن دا اتاپ ءوتتى. وسىلايشا، ەلدەرىمىزدىڭ ورتاق تاريحى مەن مادەنيەتى ت م ى ك ۇيىمىنا مۇشە ەلدەر مەن ماجارستان اراسىنداعى ءوزارا ءتيىمدى ىنتىماقتاستىقتى دامىتۋعا كەپىل بولادى.

ودان باسقا، ت م ى ك س ءى م كەڭەسىنىڭ وتىرىسىندا تاراپتار 2019-جىلعى 15- قازاندا باكۋدە بولاتىن ت م ى ك 7- سامميتىنىڭ ماسەلەلەرىن دە تالقىلادى.

ءىس-شارا اياسىندا ماجارستان پرەمەر-ءمينيسترى ۆ. وربان رەزيدەنتسياسىندا ت م ى ك مۇشە ەلدەر دەلەگاتسيالارىنىڭ باسشىلارى مەن ت م ى ك باس حاتشىسى ب. امىرەيەۆتى قابىلدادى.

ت م ى ك ق ر تۇڭعىش پرەزيدەنتى- ەلباسى ن. نازاربايەۆتىڭ باستاماسىمەن 2009-جىلعى 3- قازاندا قۇرىلدى. ازەربايجان، قازاقستان، قىرعىزستان مەن تۇركيا وعان مۇشە مەملەكەتتەر بولىپ تابىلادى. ماجارستان ت م ى ك بايقاۋشى ەل مارتەبەسىنە يە.