پۋتيندى «قۋماق بولعان» ساحا باقسىسى ۇستالدى
ۆەدومستۆو وندا باقسىعا ىزدەۋ جاريالانعانىن ايتادى. گابىشيەۆتىڭ ۇستىنەن قانداي باپپەن ءىس قوزعالعانىن مينيسترلىك جازباعان.
19- قىركۇيەكتە گابىشيەۆتىڭ جوعالىپ كەتكەنى حابارلانعان. باقسىنىڭ تانىستارىنىڭ ازاتتىققا ايتۋىنشا، تۇندە يركۋتسك وبلىسىنداعى ۆىدرينو لاگەرىنە بىرنەشە كولىك كەلگەن. ماسكا كيىپ، قولىنا اۆتومات پەن رەزەڭكە تاياق ۇستاعان ادامدار باقسىنى قورشاپ الىپ، جەرگە جاتقىزىپ تەكسەرگەن. وسىدان سوڭ كولىككە سۇيرەپ اپارىپ، وتىرعىزىپ، بەلگىسىز جاققا الىپ كەتكەن.
«تراسسانى ارنايى جاساق وكىلدەرى قارۋمەن قورشاپ الدى» دەدى وقيعا كۋاگەرلەرىنىڭ ءبىرى.
وقيعا كۋاگەرلەرىنىڭ ءبىرىنىڭ سوزىنە سۇيەنگەن znak.com سايتىنىڭ جازۋىنشا، باقسىنى پوليتسيا ۇستاپ، ونىڭ ۇستىنەن «ەكسترەميستىك قاۋىمداستىق ۇيىمداستىرۋ» بابى بويىنشا قىلمىستىق ءىس قوزعاعان بولۋى مۇمكىن. قۇقىق قورعاۋ ورگاندارىنداعى قۇپيا دەرەك كوزىنە سۇيەنگەن جۋرناليست بوريس ۆەتروۆ تا باقسىنىڭ ۇستىنەن قىلمىستىق ءىس قوزعالعانىن جازادى.
ساحا باقسىسى الەكساندر گابىشيەۆ ءتورت ايدان بەرى قيىر شىعىستان ماسكەۋگە قاراي جول ءجۇرىپ كەلەدى. ونىڭ پىكىرىنشە، «رەسەي پرەزيدەنتى قارا كۇشتەن جارالعان جانە ونىمەن تەك باقسى عانا كۇرەسە الادى». وسىعان دەيىن 2 مىڭ شاقىرىمعا جۋىق جەر جۇرگەن گابىشيەۆ جولشىباي جۇزدەگەن جۇرگىزۋشىمەن سويلەسىپ، ونىڭ ۇگىت- ناسيحاتى ۆيدەوسى ينتەرنەتتە ميلليون رەت كورىلگەن.