الەمدە قانشا ءتىل بار؟
جەر جۇزىندە نەشە ءتىل قالدى؟ ۇساق تىلدەردىڭ ۇمىتىلۋ ۇدەرىسى جالعاسا بەرسە، عاسىر سوڭىندا قانشا ءتىل قالماق؟ بايىرعى حالىقتار ماسەلەسىنە ارنالعان تۇراقتى فورۋمنىڭ 15- سەسسياسىندا، ءار 2 اپتا سايىن الەمدە 1 ءتىل ۇمىتىلاتىنى مالىمدەلگەن. فورۋم بارىسىندا وقىلعان باياندامالاردىڭ بىرىندە، قازىر الەمدە 6700 ءتىل بار ەكەنى ايتىلدى. ونىڭ 96 پايىزىن الەم تۇرعىندارىنىڭ 3 پايىزى عانا قولدانادى. جويىلۋ قاۋپى تونگەن تىلدەردىڭ دەنى بايىرعى حالىقتارعا تيەسىلى. ساراپشىلاردىڭ پىكىرىنشە، بايىرعى حالىقتاردىڭ جويىلۋى جانە ولاردىڭ مادەنيەتى قۇرىپ بارا جاتقانى وتارلاۋ سالدارىنان بولدى. سونىمەن قاتار، ماسەلەنى جاھاندانۋ مەن باسىم تۇسكەن مادەنيەت پەن تىلدەر ۋشىقتىرا تۇسكەن.
عالىمدار 2100 -جىلعا دەيىن الەمدە 3500 دەي ءتىل قولدانىستان شىعادى دەپ وتىر. وعان سەبەپ، الەمدە ءوز تىلىندە سويلەۋشى حالىقتىڭ ءوزى قۇرىپ، جويىلىپ جاتقانى.
تىلدەردىڭ جويىلىپ كەتۋىنە دالەل رەتىندە اۆسترالياداعى جاعدايدى الىپ كورەيىك. ⅩⅩ عاسىردىڭ باس كەزىندە بۇل قۇرلىقتا 400 دەن استام ءتىل بولعان. ءبىراق، قازىر تەك قانا 25 تەي ءتىل ساقتالعان. ال، افريكادا 1400 ءتىلدىڭ 600 گە جۋىعى جوعالىپ كەتۋ قاۋپىندە تۇر. سولتۇستىك شىعىس ازيادا ورىس ءتىلىنىڭ ىقپال ەتۋىنەن 47 ءتىلدىڭ ىشىندە تەك 6 ءتىل عانا ساقتالعان. ال تايۆاندا قىتاي ءتىلىنىڭ كوپ قولدانىلۋىنان 23 ءتىل قۇرىپ كەتكەن. كامەرۋن ەلىندە 1995 -جىلى 5 -قاراشا كۇنى كاسابا ءتىلى ءولدى دەپ جاريالاندى.
ويتكەنى سول جەردەگى مومبيلا اۋدانىندا تۇراتىن بوگون ەسىمدى ازامات قاراشانىڭ 4 ى كۇنى دۇنيە سالعان. ال ول ادام سول كاسابا تىلىندە سويلەۋشى سوڭعى ادام بولعان. جوعالىپ بارا جاتقان تىلدەر قاتارىنا كەت ءتىلى كىرەدى. ول تىلدە بار جوعى 200 دەي عانا ادام سويلەيدى. كەت ءتىلى ءسىبىر جازىعىندا ساقتالعان اۋىلداردا عانا قولدانىلادى. اۋعان ەلىندەگى تيراحي تىلىندە سويلەيتىن 70 اق ادام قالعان. دۇنيەجۇزىندە 100 ميلليوننان استام قولدانۋشىسى بار 8 ءتىل ءتىرى جانە ولار كەرەمەت قارقىنمەن دامىپ جاتىر. ولار: قىتاي، يسپان، اعىلشىن، بەنگال، حيندي، پورتۋگال، ورىس جانە جاپون تىلدەرى.
Massaget.kz