اقمولالىق سامبوشى ازيا چەمپيونى اتاندى

 كوكشەتاۋ. قازاقپارات - اقمولالىق سامبوشى ۆالەريا اكسەنوۆا ازيا چەمپيونى اتاندى، دەپ حابارلايدى قازاقپارات ءتىلشىسى وبلىستىق دەنە شىنىقتىرۋ جانە سپورت باسقارماسى باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، ءۇندىستاننىڭ نيۋ- دەلي قالاسىندا ازيانىڭ 20 ەلىنەن جينالعان 350 استام سپورتشىنىڭ قاتىسۋىمەن سامبودان قۇرلىق چەمپيوناتى وتكەن.

«كلاسسيكالىق جانە اسكەري ادىستەر بويىنشا وتكەن جارىستا اقمولالىق ۆالەريا اكسەنوۆا 75 كەلىدەن جوعارى سالماقتا ازيا چەمپيونى اتاندى. جەرلەسىمىز نۇرتاس شاتكەنوۆ پەن ەۆگەني سۋدەيكيننىڭ جەتەكشىلىگىمەن جاتتىعىپ ءجۇر» ، - دەيدى ۆەدومستۆونىڭ باسپا ءسوز حاتشىسى ماحاببات بولشينا.

جالپى، جارىس قورىتىندىسى بويىنشا ەڭ كوپ ۇپاي جيناعان وزبەكستان قۇراماسى - 22 التىن، 11 كۇمىس جانە 6 قولا مەدالمەن كوماندالىق ەسەپتە ءبىرىنشى ورىن العان. ودان كەيىن 20 التىن، 16 كۇمىس جانە 10 قولا مەدال يەلەنگەن قازاقستان قۇراماسى - ەكىنشى، 5 التىن، 1 كۇمىس جانە 2 قولا ەنشىلەگەن موڭعوليا قۇراماسى - ءۇشىنشى ورىنعا تۇراقتادى.